WILLEMSTAD.- Abitantenan di e bario Sta. Catharina ta uni pa huntu prevení mas tantu ku ta posibel ku un di nan ta bira víktima di aktonan kriminal manera ladronisia. Djasabra último e asosashon di bario bou di presidensia di Jasper Provence huntu ku miembro di direktiva ku ta trèk e inisiativa aki, Antonio Hernandez a organisá un atardi di informashon ku agentenan polisial di Montaña.

Presente tabata entre otro “buurtregisseur” sr. Aniceta i agente polisial sra. Pastoor. Polis a duna splikashon amplio di medidanan ku abitantenan por tuma pa prevení mas tantu ku ta posibel ku nan ta bira víktima di ladronisia, sea di outo òf ku ta drenta den nan kas i hòrta. Tambe a splika abitantenan ku nan mester organisá nan mes den un “neighbourhood watch”.

Hernandez ta bisa ku den e informashon ku polis a trese dilanti a duna abitantenan tur hèrmènt pa prevení kasonan di ladronisia. E mensahe prinsipal tabata pa tur abitante mester ta alerta kuminsando serka nan mes, pero tambe ku nan mester ta uní, yuda vigilá propiedat di bisiña i ku e bario mester ta organisá.

Kada abitante mester ta konsiente ku ta huntu mester ta alerta riba kiko ta pasa den nan bario manera na momento ku mira un hende straño den bario pa tuma kontakto ku otro. Si e esfuerso konhunto aki no t’ei e chèns di bira víktima di ladronisia ta bira mas grandi.

Den kaso ku un kaso di ladronisia tuma lugá i un abitante tuma nota di esaki ta importante pa paga tinu riba sierto detaye spesífiko manera ki outo e ladronnan ta kore aden, kiko e number di outo ta, ki paña nan tin bistí, koló di kabei i koló di kueru.

Hernandez ta bisa ku e atardi di informashon tabata bon bishitá i a dura di 6’or pa 8’or. Tabatin hopi pregunta di abitantenan pa e agentenan polisial i a keda deliberá te mas lat.