WILLEMSTAD.-Parlamento a saka un invitashon pa djaluna awor 30 di novèmber pa tratamentu di  e proyekto di lei di eksepshon (Landsverordening uitzonderingstoestand). E proyekto di lei ei tabata riba agènda di Parlamento djaluna 23 di novèmber último pero a stòp e tratamentu despues ku a lanta bastante diskushon den komunidat riba kontenido di e proyekto di lei.

Gobièrnu di Kòrsou a opta pa duna informashon na komunidat pa asina baha e diskushon i asta tenshon ku a surgi na momentu ku otronan ku no ta gobièrnu a kuminsá duna tur klase di splikashon i interpretashon na loke tin skibi den e teksto di e lei.

Pa djaluna awor ta spera ku e tratamentu ta tuma lugá pa 10’or di mainta. Esei ta e úniko punto riba agènda di e reunion di djaluna.