WILLEMSTAD.- Korte di promé instansia ayera a trata un kaso lamentabel di un stazjèr ku a hinka 27 gram di mariwana den prizòn pa un detenido.
Ta trata di e akusado femenino S.I.(24) ku tabata studiando pa trahadó sosial na universidat di Kòrsou, ku a keda gará ku e droga den su parti íntimo.
Segun e akusashon di Ministerio Públiko, e akusado tabatin e droga den e periodo di 29 pa 30 di òktober 2019 de su poder.
Hues Verbeek ku ayera a hasi e kaso pa promé bia aki na Kòrsou, a relatá ku outoridatnan a haña informashon ku e stazjèr enkuestion ta hinkando telefòn i droga den e instituto pa detenidonan. Riba e dia di e suseso, nan a haña un yamada ku ta bisa ku e stazjèr e dia ei lo ta tresiendo droga.
Na momento ku e stazjèr a yega e instituto, esnan konserní a listr’e mas profundo, di kual nan a haña 2 blòki di hash den su parti íntimo.
Mes ora el a atmití su kulpa i a koperá bon ku hustisia. El a bisa ku e droga tabata destiná pa e detenido maskulino K. Aitatus.
Segun e akusado den e instituto el a konosé e detenido. Nan a sera un amistat i despues Aitatus a pidié pa hasié fabor.
El a bisa ku esei tabata di dos bia ku el a drenta ku droga pa e detenido.
Nunka e no a hinka e telefòn. E tin hopi duele di loke el a hasi. Segun e akusado na promé instante e no tabatin un idea ku ta trata di algu ilegal.
Ora el a haña sa i tabatin e droga den su poder kaba e tabatin miedu di bisa no, pa e no haña represaya.
Hues a bisa ku na polis e akusado a deklará ku e mester a pasa tuma sèn serka un hende ku e detenido a traha afsprak kuné, pa e bai tuma e droga.
Polis a skucha e detenido ku na promé instansia no kier a papia nada, pero despues el a bisa ku e konosé e akusado i a pidié un fabor kual e akusado a bai di akuerdo.
Segun e akusado, e ta haña e kos ku el a hasi hopi robes, paso un kos asina no por wòrdu hasi.
Pa loke ta trata su skol, el a splika ayera ku e skol mes a pone un paro na su estudio.
El a inskribí su mes na otro skol pa asina e sigui e ramo di abogasia.