WILLEMSTAD – Stephan Vidal a firma ku e organisashon di Liga Grandi, Kansas City Royals komo agente liber. E kècher yu di Kòrsou tin un trayektoria largu den beisbòl lokal formando parti di tur selekshon di Little League Liga Pariba. Semper el a  forma parti di e organisashon di Brievengat. Un hóben hopi disiplina ku a traha duru pa awe por a logra ku su soño a bisa realidat firmando un kontrakt profeshonal. Vidal despues di a finalisá su skol aki na Kòrsou a bai studia i hunga su deporte faborito na Trinity Christian Academy Highschool. Despues di a gradua el a risibí un beka na North Central Missouri i despues su último dos añanan universitario na Jackson State University. Aktualmente e ta forma parti tambe di e ekipo Doble A di Groot Kwartier Stars. Riba tur e nivel ku Stephan Vidal a hunga el a aselerá.  Riba su página di Instagram, Vidal a anunsiá si reto nobo di su karera di beisbol ku Kansas City Royals. “Mi ta sinti mi humildemente orguyoso ku mi soño finalmente a bira realidat. Mi kier a gradisí mi famia ku nunka no a stòp di kere den mi i tur esnan ku tabata tei semper pa mi. Gloria na Dios.”

Vidal ta uni su mes na un kantidat di hóben peloteronan yu di Kòrsou ku ta forma parti di vários organisashon di Liga Grandi. E ta bira e di dos pelotero yu di Kòrsou ku ta firma e siman aki ku un organisashon di Liga Grandi saliendo for di Skol na Merka. Anteriormente tabata Aldrick ‘Chaparo’ De Jongh ku a firma ku Los Angeles Dodgers. Aktualmente tin un otro hóben pelotero ku tambe ta forma parti di e organisashon di Royals ku ta Dayton Biegel.