WILLEMSTAD.- Ayera mainta, Kòrsou a habri un luna nobo ku un kaso tristu i lamentabel. Ta trata aki di un kurpa sin bida ku a haña banda di stadion di Suffisant.

Alrededor di algu pa seis, Sentral di Polis a dirigí un unidat polisial den área di Suffisant pa ta mas eksakto patras di Stadion Odulio Willems, na unda a bin topa ku un hòmber ku no tabata duna señal di bida. E hòmber aki tabatin heridanan grave na su kurpa. Asta tin indikashon di herida di bala na altura di su kustia. Aparte di esaki a pidi presensia di departamentu di tráfiko i tambe ForenSys pa presentá na e sitio, mirando ku tin probabilidat ku lo a dal e víktima tambe ku outo.

Mas lat dòkter di polis a konstatá morto di e hòmber  Steve Andrew Jordano Wout, nase dia 6 di yanüari1998. Ta trata aki di un hoben di 23 aña. Te den oranan di mèrdia, outoridatnan a keda na e sitio hasiendo e investigashonnan nesesario. Na e momentonan aki polis no ta disponé di mas informashon riba e kaso. Riba òrdu di fiskal di Ministerio Públiko a konfiská e kurpa pa mas investigashon.

Si tin personanan ku por a mira kiko a sosodé ku e víktima aki, sea asina bon di drenta den kontakto ku polis na e number 917, kompletamente grátis 24 ora pa dia òf 108 si bo ta deseá na keda anónimo.