WILLEMSTAD - E luna aki, embahador di e fundashon, veterinario Piet Hellemans, a sterilisá pushi number 1000. Meskos ku aña pasá Stichting Kitten Rescue Curaçao un biaha mas a logra sterilisá mas ku 1000 pushi. Esaki ta enserá pushi di doñonan ku ménos rekurso i pushinan di kaya. Ku kada sterilisashon ta evitá mas yu di pushi nase i e fundashon ta aspirá di asina, ku tempu, di yega na un ekilibrio sano di kantidat di pushi riba nos isla. Segun e fundashon, sterilisashon en grande ta e úniko manera adekuá pa mehorá bienestar di bestia i baha e kantidat di bestia riba kaya.

Despues di e delaster sterilisashon, Piet Hellemans a entregá un chèk na Miriam i Marcel, e dos inisiadónan di e enfoke di sterilisashon na Kòrsou. Piet por a hasi entrega di e chèk aki na nòmber di stichting Dierenlot i stichting Abri voor dieren, ku konhuntamente a sera fondo na balor di no ménos ku 43.563,- Euro (mas ku 86.000 ANG), na benefisio di sterilisashon i chipmentu di mas tantu pushi posibel den 2024!

E fundashon tin e meta, un biaha mas den 2024, di sterilisá por lo ménos 1000 pushi ku yudansa di veterinarionan hulandes boluntario. Ademas e fundashon ke traha mas será ku veterinarionan lokal, pa asina logra mas sterilisashon. E fundashon ta spera di duna e kolaborashon lokal aki mas forma den 2024.

 (foto kittenrescuecuracao.com)