WILLEMSTAD.- Despues di un trayekto ekstenso e desishon a keda tumá: Stichting Monumentenzorg Curaçao (SMC) a bira e doño nobo di e edifisio ku den boka di pueblo ta konosí komo “La Moda de Paris” den Consciëntiesteeg na Otrobanda.

Despues ku na desèmber 2020 e fachada di e edifisio a kai den otro, no a sobra e doño anterior niun otro opshon ku ta di bende e edifisio mas pronto posibel pa salba maske ta un parti di dje. SMC di un banda ta hopi kontentu, pasobra di e forma aki ta kumpli ku e ophetivo primario di e fundashon.

Di e otro un banda SMC ta konsiente tambe di e reto grandi ku e tin su dilanti pa ku restourashon di e edifisio. “E dak di e bibienda ta den un estado deplorabel. Mas pronto posibel mester hasi restourashon di casco”, asina e fundashon a duna di konosé. Pero promé ku yega e fase aki, mester hasi e parti di e dos edifisionan ku e kai den otro limpi. Esaki ta sumamente importante, pasobra di e forma aki por habri e hanchi ku ya pa algun aña no tabata aksesibel mas. “Nos ta konvensí ku nos komunidat ta mihó sirbí ku esaki”, SMC ta sigui bisa. No ta konosí ainda kua funshon lo duna e dos edifisionan den futuro. Promé ku yega na e punto ei, ta bai hasi limpi, midi i pinta, pa despues kuminsá ku e diseño.