WILLEMSTAD. - Un grupo di kurasoleño bibá na Ulanda i ku tin’e bon a lanta un par di aña tras di lomba “Stichting Speciaal voor Curacao” ku e meta pa yuda e komunidat di Kòrsou ku donashonnan ku ta nesesario pa prinsipalmente skolnan, i institutonan ku ta kuida hende etcetera. Ya pa un par di aña kaba e fundashon aki ta manda kònteiner yen di kos pa Kòrsou. E biaha aki atrobe ta e kaso.
Den wikènt tras di lomba e fundashon a sera un kònteiner di 40 pia ku aki tres siman lo yega Kòrsou, nèt promé ku aña eskolar nobo kuminsá.
Den e kontenido tin masha hopi kos di uso pa skolnan i institutonan di kuido aki na Kòrsou.
Ta na kaminda 200 mesa i stul pa alumnonan sinta den klas na skol, büró i stul pa dosentenan, 4000 schrift, tas pa skol, buki, t’shirt, tin 3 kaha ku etuí, tin artíkulo pa beibi, sapatu pa mucha, kama, kashi i hopi mas.
E fundashon ta haña donashon na Ulanda for di diferente instansia i esakinan nan ta manda Kòrsou komo donashon.
Sra. Chantal Sambo resientemente tabata na Kòrsou i a hasi un inventarisashon i a sa di skohe e skolnan i instansianan ku realmente tin nesesidat di kosnan pa skol i tambe kasnan di kuido.
Skolnan na parti Pariba di Kòrsou i tambe parti Pabou di Kòrsou ta riba lista pa haña e donashonnan aki.
Aki tres siman Sra. Sambo a splika EXTRA ku e kònteiner lo yega Kòrsou.