WILLEMSTAD. - Giovanni Decaster Presidente di Sindikato Transporte Optimalisá (STO), tin sintimentunan miksto pa ku selebrashon di ‘Dia di Obrero’ e aña aki. Decaster a splika ku mirando e situashon manera e ta awor aki pa loke ta trata e sektor laboral, e no ta mira nada di selebrá. Esunnan ku ainda tin trabou, pero hopi biaha tin di traha bou di preshon inhustu, kisas tòg lo por selebrá ‘Dia di Obrero’.

Den su deklarashon fórmula pa redakshon di EXTRA, Decaster a splika ku mirando e echo ku tin den tapara pa introdusí lei di fleksibilisashon, ta kitando hopi hende for di trabou aktualmente i asta awor aki ta menasa trahadónan ku si nan no vakuná, nan lo no por bai trabou, ku tur e konsekuensia ku esaki ta bin kuné, Decaster a bisa ku e no sa kiko defakto mester selebrá riba e dia aki, pa motibu ku e no ta mira ku ta duna e klase trahadó e balor meresé.

Den e mundu di bùs, Decaster a trese dilanti ku nan ta trahando tur dia hopi duru, pero nan no ta mira nada ku ta keda hasí pa e sektor aki i su trahadónan.

Tur loke ku e por bisa su miembronan i tur ku ta traha den e sektor di transporte públiko en general, ta pa sigui perseverá i ta di spera ku por sali for di situashon penoso aki.

Di parti di gobièrnu e no ta mira muchu balor ku ta duna trahadónan. Decaster a mustra ku tin hopi keho i abusu laboral ku ta tumando lugá, kaminda ku SOAW ta bisa ku nan ta na altura di e abusunan, tòg te ainda nada no ta keda solushoná pa ku abusu laboral.

P’esei ta difísil selebrá un dia manera ‘Dia di Obrero’, kaminda tur hende sa kuantu abusu laboral ta tumando lugá, Decaster a bisa ku e no sa kiko tin di selebrá.

A yega tempu pa gobièrnu kuminsá ataká e abusunan ku nan ta konsiente di dje i ounke ku no por eliminá esaki por kompleto, pero a lo ménos por baha e abusunan un poko i e ora ei lo por tin kos pa selebrá.