WILLEMSTAD.- Mester stòp e prohibishon di alkohòl den hóreka awor. Esaki un grupo di empresario den hóreka preokupá ta bisa den un karta pa gobièrnu. E sektor ta sufri desproporshonalmente bou di e medida aki i otro medida di corona.

E sektor di hóreka ta un di e ramonan i pilanan di ekonomia di mas grandi na Kòrsou. Direktamente i indirektamente e sektor ta e dunadó di empleo di mas grandi.

E prohibishon di konsumo di alkohòl serka tur lugá di hóreka ku tin un pèrmit di alkohòl, ta dal e empresanan duru. Hopi empresa for di kuminsamentu di e medidanan a mira nan entradanan baha formal. Un daño grandi, ku ta e konsekuensia direkto di e maneho di gobièrnu.

prevení mas daño

Pa prevení mas daño e grupo ke basha bibida alkohóliko atrobe den bar, restorant i hotèl. Mester pone e toke de keda un ora mas lat. E ora ei restorant i lugá di kome por keda habri te 9 or di anochi, pa asina por distribuí e wéspetnan mihó. Naturalmente hóreka lo ten’é na e palabrashonnan ku e mesanan riba e terasanan ta para sufisiente leu for di otro i ku tin maksimalmente kuater wéspet pa mesa. Kompania di hóreka ku no tin un terasa temporalmente lo mester por ekipá un espasio pafó komo terasa.

For di kas

E prohibishon di alkohòl a manda e bishitante kas, kaminda e mayoria di kontagio ta tuma lugá i kaminda gobièrnu no tin kòntròl. Si kita e prohibishon di alkohòl ta trese e kòntròl bèk den hóreka, kaminda empleo di ‘crowd manager’ i seguridat èkstra mester vigilá ku ta kumpli ku e reglanan, manera registrashon di wéspet, higiena, distansia sosial i obligashon di bisti tapaboka.

E sektor di hóreka enfátikamente ta rekonosé e nesesidat di medida pa limitá kontagio ku e vírùs Covid-19 mas tantu posibel i ta tuma su responsabilidat tambe den esaki. Banda di e medidanan menshoná aki ‘riba hóreka por lo pronto lo no ofresé deskuento spesial riba bibida alkohóliko. Den e lunanan ku a pasa hóreka a mustra ku e por operá responsabelmente, tumando tur medida na kuenta.

Kompensashon

Aktualmente e sektor ta haña sla masha duru, e nesesidat ta haltu i e no por para mira sin bisa nada kon e kompanianan ta kai un pa un. Ta tuma medida nobo ku ta limitá i asina ta baha volúmen di benta, pero no ta papia di un kompensashon mas haltu di e gastunan.

For di djamars 8 di desèmber gobièrnu hulandes a pone Kòrsou riba kódigo oraño. Esaki ke men ku no tin mas turista ta bi keda na Kòrsou. Sin turista no tin eksistensia mas pa mayoria di restorant i bar na e isla. I di otro banda, sin bar i restorant Kòrsou ta hopi ménos atraktivo pa turista.

P’esei un bon koperashon entre e sektor di hóreka i gobièrnu ta nesesario. E empresarionan lo tin gana di mira ku gobièrnu ta mira e importansia di esaki i ku lo tene deliberashon mihó, awor i den futuro. E sektor ta apelá pa hasi uso di e ekspertisio, inisiativa i eksperensia ku ta presente ampliamente den e sektor di hóreka na Kòrsou. Tur dos, gobièrnu i empresario na final ta sirbi e mesun kousa. Pa mehorá i mantené e úniko pilá ekonómiko di Kòrsou ku por krese i rèk.