Kategoria: Deportista, Dirigente atministrativo i Dirigente tékniko
Introdukshon:
Ezzard Franklin Semeleer, mihó konosí komo Ezzy a nasé dia 14 mart 1951 den e bario di Noord di Saliña na Boneiru. Despues ku el a kaba skol, el a bai studia pa banketbakker na Hulanda. E último 20 añanan el a duna lès na komunidat di skol Boneriano. El a praktiká e deportenan futbòl i biar. Tambe el a fungi komo dirigente pa hopi aña den tur dos deporte. Pero Ezzy su pashon tabata i ta pa e deporte di biar. Fuera di deporte Ezzy ta un gran persona.
Karera komo deportista i dirigente:
1. Futbòl:
Ezzy a praktiká e deporte di futbòl den speeltuin di su bario Noord di Saliña. Ku 16 aña di edat el a kuminsá hunga bala den junior di e ekipo di su bario Estrellas. El a hunga tambe 2 biaha den Selekshon Hubenil di Boneiru. Despues Ezzy a hunga 2 aña den Klase A pa Sport Boys, ku tabata e di dos tim di Estrellas. Despues di esei, el a hunga den senior di Estrellas.
Di 1970 pa 1973 Ezzy a bai hunga 3 temporada pa S.V. Juventus i despues e la bolbe regresá Estrellas te ku 1985/86. Ezzy a hunga tambe den veterano ku S.V. Hobon i e tabata 16 aña presidente di nan. Den Estrellas tambe el a fungi den direktiva komo komisario i presidente. Pa e federashon di futbòl Boneriano FFB, e tabata presidente di e komishon di straf i protesta. El a traha mas di 20 aña pa e komishon di straf i protesta.
Logronan:
– 1974/75 Kampion di Boneiru, ku Estrellas.
– 1978 Kampion di Boneiru, ku Estrellas.
– 1983 Sub Kampion di Boneiru, ku Estrelllas.
2. Biar:
Ezzy a kuminsá hunga e deporte di biar ku 14 aña edat den bar di Mingi Martis na Antriol.
Su pashon tabata i ta pa e deporte di biar.
Di 1985 t/k 1991 Ezzy tabata organisá biar di pool na Paito Snack den Noord di Saliña.
Su meta tabata pa promové e deporte di biar den bario. Di 1987 pa 1991 el a yuda lanta 5 ekipo di biar den bario di Noord di Saliña.
Na aña 1999 Ezzy a bai Kòrsou ku un grupo di 8 hóben di Boneiru, pa kompetí ku 8 hóben di Kòrsou i nan a gana e 3 premionan mas grandi.
Fundamentu di Azteca:
Un di e ekiponan ku Ezzy a funda dia 2 yüni 1987 ta “BT Azteca”, ku ta konsistí di hopi hungadó di e bario di Noord di Saliña. E ekipo Azteca a bira diferente biaha Kampion i Sub Kampion di torneonan pafó di Boneiru. Den torneo “King of The Caribbean”, nan a sali un biaha na di 4 lugá i un biaha na di 5 lugá, entre 16 pa 20 ekiponan di Antia, Caribe i un di Hulanda. Na Boneiru nan a sali diferente biaha Sub Kampion i 5 biaha Kampion di Kampionato Biar di Boneiru.
Fundamentu di Febibo:
Na aña 1991 un gran amigu Antonio Mercera a aserka Ezzy pa yud’é lanta un federashon di biar.
Nan a lant’é dia 15 mart 1991 i dun’e e nòmber di “Febibo”. Di 1992 t/k 2000 i di 2004 t/k 2010 Ezzy tabata presidente di Federashon di Biar di Boneiru “Febibo”. Aktualmente e ta konsehero di e fundashon.
Logronan:
– 5x Kampion di Kampionato biar (pool) di Boneiru, 2012, 2013/14, 2014/15, 2016/17 i 2019/20.
– diferente biaha Sub Kampion di Kampionato biar (pool) di Boneiru.
– 4 lugá Torneo King of the Caribbean.
– 5 lugá Torneo King of the Caribbean.
Rekonosementunan risibí:
– 2001 Un torneo ABC a wòrdu dediká na su persona dor di Federashon di Biar di Aruba.
– 2013 Kampionato Bola 8 dediká na su persona dor di Federashon di Biar Boneriano Febibo.
– 2018 Lid in de Orde van Oranje – Nassau.
– 2019 Honrá komo “Cuidadano di Honor” di Noord di Saliña pa Fundashon Nawati.
– 2020 Nombrá komo “Cuidadano di Honor” dor di Gobièrnu di Boneiru.
+Foto

 

 

 

 

 

 

Ezzy Semeleer…

 

 

 

 

 

 

Ezzy nombrá komo “Cuidadano di Honor” dor di Gobièrnu di Boneiru…

 

 

 

 

 

 

Emblema di su ekipo di biar AZTEKA…

 

 

 

 

 

Ezzy di dos para for di banda robes den su ekipo di futbòl di bario Estrellas di Noord di Saliña…

 

 

 

 

 

 

Ezzy hungando biar…

 

 

LAGA UN KOMENTARIO

Please enter your comment!
Please enter your name here