WILLEMSTAD. - Resientemente korte a atendé un disputa entre di un banko komersial lokal kontra di un trahadó ku e banko a kita for di trabou den un forma inmediato. Motibu di e retiro tabata ku e trahadó tabata trahando pa e banko den Curaçao Festival Center durante Tumba di Karnaval, lo tabata ‘stream’ e festival di tumba ‘live’ i personal di seguridat a nota esaki i einan a surgi un problema ku a kaba den retiro di e trahadó.

Tabata 26 yanüari último ku un banko komersial lokal a duna un empleado retiro inmediato, pasobra personal di seguridat di Curaçao Festival Center (CFC) a hañ’é ta ‘stream’ e Festival di Tumba ‘live’ djamars anochi.

E personal di seguridat ku tabata trahando den CFC e anochi ei a kita e telefòn for di e empleado di banko i a kana bai kantor di Feco Gomes kuné. E persona tabata trahando pa e banko den CFC, pues trahando pa e banko tur e anochi nan.

Den kantor nan a kita ‘badge’ di entrada for di dje i sak’é for di CFC.

A konsekuensia di e insidente aki, e banko a dun’é su retiro i a keda para riba e punto di bista ku tabata ampliamente konosí ku no tabatin mag di ‘stream’ i hasiendo esei e trahadó a hasi algu ilegal, kual ta un echo pa kua nan por dun’é su retiro. Un motibu mas ku e banko a duna pa hustifiká retiro di e trahadó, ta ku el a aktua (verbalmente) agresivo kontra e personal di seguridat. E retiro tabata inmediato,  i sin ningun pago.

E trahadó a bringa e kaso i a trese dilanti ku e no tabata na altura ku no mag di ‘stream’, ku ni pafó, ni na entrada, ni paden ni niun kaminda den CFC tabatin bon kla stipulá o pon’é ku no mag di ‘stream’.

Subsidiariamente e trahadó a para riba e punto di bista, ku te na ora mes no tabatin mag di ‘stream’, e kos ei no ta trese kuné un motibu asina pisá ku ta hustifiká un retiro inmediato. Mas ainda pasobra tabata grabashonnan chikitu. Pa aklará su punto e trahadó a bini ku vários video pa hues mira ku den públiko tabatin vários persona ta graba, entre nan vários di e partisipantenan mes! Pues esei tabata pa suprayá ku no tabata sufisientemente konosí ku no tabatin mag di ‘stream’.

Mas aleu e trahadó a trese dilanti ku e personal di seguridat ku a aserk’é a yega i na lugá di komuniká manera hende desente, a ranka e telefòn for di su man. E trahadó na su turno a ranka e telefòn bèk, simplemente pasobra ta su propiedat.

Seguidamente, e agente di seguridat aki a bai over na gara e trahadó ku man fuerte tras di e trahadó su garganta i ku su mannan tras di su lomba. E trahadó aki tin añanan ta hañando tratamentu pa doló na garganta i skouder. Pues a konsekuensia di e doló ku el a sinti, a poné grita e personal di seguridat. Mas aleu e personal di seguridat mes a pone den un deklarashon ku el a bai pa arestá e trahadó pasó e tabata kometiendo un akto ilegal.

Abogado mr. Nirayca Luisa tabatin e interes di e trahadó na su enkargo i durante e tratamentu di e kaso den korte, nan a  para hopi fuerte riba e punto aki, komo ku un personal di seguridat no ta un agente polisial ku tin e outoridat pa persiguí i no por arestá ningun persona miéntras ku esaki no a hasi un echo kastigabel pa lei.

Tur e puntonan aki abogado Luisa a trese dilanti i den konsiderashon di tur esaki nan, hues a puntra e banko si nan ke yega na negoshashon promé ku e duna un veredikto.

Partidonan e ora ei a hasi uso di esaki i finalmente e banko a bai di akuerdo pa paga e trahadó un suma di plaka kuantioso i a kita e retiro inmediato for di riba mesa. E relashon di trabou a kaba den akuerdo mutuo.

Konsiderando e situashon manera e tabata, e (eks) trahadó di banko tabata satisfecho ku e resultado, mirando e echo ku e por a bai kas ku un suma di plaka.