Awe lo trata e tópiko di kousanan i konsekuensianan di Strès den e seri di salú ku Benu Pharmacy ta organisá. Awe Sharon Burgler di Forsalidad lo tei presente na Renaissance Hotel den e sala di konferensia pa kompartí ku tur presente  kon grave strès por ta i kiko pa hasi pa tin ménos strès posibel.

Benu seri di salú

Natasha Welage di Benu Pharmacy a splika ku e charla di awe ta praktikamente yen, pero esei no ta nifiká ku ta tene niun hende afó. Kòrda si pa registrá di mitar di 7 pa 7 or di anochi i pa e charla mes tuma lugá di 7 pa 8 or di anochi. Benu Pharmacy tin 3 botika na Kòrsou ku ta Dominguito, Palu Blanku, Otrobanda i tambe tin botikanan na Aruba i St. Maarten i di mes na Ulanda mas di 500 botika. Nan no ta simplemente un botika pero ta krea den duna hende e hèrmènt i edukashon kon pa kuida nan mes salú. Nan ta kere ku hende mester tin mas responsabilidat pa nan mes salú i p’esei ta duna e hende opshon i servisionan den e botikanan di Benu manera midi preshon, suku i kolesteròl kompletamente grátis. Banda di esei tin e serinan di salú pa un aña kaba i ta un manera pa duna bèk na Komunidat i siña nan tepnan balioso kiko pa hasi pa kuida nan mes., I den e kuadro aki ta trese invitadonan di eksterior pa e charlanan. E charlanan ta pa komunidat i pa profeshonalnan. E charla di strès na trabou, ta un tópiko basta kayente aktualmente. I esei ta loke Benu ta hasi, nan ta buska tópikonan ku ta bibando den komunidat.

Strès ku akumulá ta bira un problema

Tur hende ta haña strès; Sharon Burgler a bisa. Sharon tin 20 aña eksperensia den duna guia i training riba e tereno di strès. Tur dia hende ta haña nan ta tuma desishonnan ku por okashon tenshon. Tur hende ta konosí ku strès. E problema no ta strès pero e ta bira problema ora strès akumulá i niun hende ta hasi algu pa nan relahá i baha di e strès aki. I na momentu ku bo tin strès bo ta bai hasi fout, bira insigur pasobra bo kabes ta yen di algu ku bo ta kere ku bo no ta hasi bo trabou bon, nan ta pèst bo, bo no ta keda balorá na trabou i hopi mas. Segun Sharon strès ta e tenshon ku e hende ta haña komo ku ta pone eksigensianan físikamente i mentalmente di e persona.

Por evitá strès

Por evitá strès. Sharon a indiká ku tin hende ta preokupá pa tur kos. I prinsipalmente riba kosnan ku nan no tin influensia riba dje. Esei tin biaha ta bin dor di kosnan ku otronan kisas tin influensia riba dje. Un ehèmpel ku Sharon a duna ta, “imaginá bu bo ta bai afó i den hotèl bo ta keda pegá den un left. Un hende ta keda trankil pero e otro hende ta kai den pániko pasobra un espasio chikí ta kousa strès”.  Ku esaki el a splika ku e strès ta diferensia di hende i p’esei tin biaha ta masha difísil pa indiká ki ora un hende tin di mas strès òf kon e hende por haña mas strès. Tambe e tin di aber hopi bia ku e eksperensia ku hende tin den su bida. I e por kuminsá for di momentu di bo nasementu, Tin nasementu ta bai suave i otronan ku strès. E tin di aber kon e hende a pasa dor di bida, si nan a haña mas, kon nan a desaroyá, kiko nan a eksperensiá. “Nos no por kalifiká strès komo un solo item”, Sharon a bisa. Esaki sigur ta bira un di e tópikonan den e charla di awe djamars esta pa no husga otro riba kuantu strès nan por karga pasobra loke esun ta karga hopi e otro ta di mas.

Trese bo mes na trankilidat

Strès na trabou ta algu ku den e tempu aktual ta hungando grandemente riba nos komunidat, i p’esei Sharon lo pone atenshon den e charla di awe riba strès na trabou., El a bisa EXTRA ku aki ta trata di preokupashonnan si e hende por paga su kosnan, si e por hiba su yunan skol, si e por paga kuminda, ta elementonan básiko ku e hende mester i si no tin e, e ta kousa preokupashon. I hende tin nesesidat pa tin un trabou pa e tin e sentimentu ku e ta kontribuí na komunidat i tin kontakto ku hende. Por pasa den un situashon asina aki, dor di biba na e momentu aki. Ku esaki Sharon ta bon pa wak si ta awor e problemanan ta i si ta NO anto mihó no preokupá pa nan awor aki. Mester wak awor i no pensa riba mañan. Ta bon pa evitá i wak kiko por hasi, pero asina bo bai preokupá riba un problema ku no tin na e momentu ei, e ta kousa strès. Dor di kue un aktitut asina e ta trese trankilidat i por buska un solushon mas lihé.  Si e hende no por trese su mes na trankilidat, e no ta haña solushon i e problema ta bira mas grandi.

Entrená i guia e direktor i akshonista

Tambe Sharon ta kere ku ta importante pa e doño di trabou pone atenshon na su trahadónan ku e ta sinti ku ta bai den direkshon di strès. Esei ta e tarea di e doño di trabou tambe. Pa e trahadó ta traha i produsí bon, mester sòru pa e trahadó ei ta sintié kómodo tambe den trabou.  Sharon den su trabou ta guia esnan direktornan, doñonan di trabou i huntanan di komisario pasobra si nan no ta sinti nan mes bon nan ta pasa esaki den e organisashon. Kon por ferwagt ku e trahadó ta amikal ku e kliente si su hefe no ta duna ehèmpel kon esaki mester ta. Sharon ta laga nan mira kon por hasié, kon solushoná e problemanan i asina haña ku hendenan ke traha ku gana. Kon bo ta duna un kòmplimènt pasobra si un biaha bo duna kòmplimènt i 10 bia ta reklamá, e reklamo ei ta dominá esun solo bia di e kòmplimènt. E hende mester siña kiko ta e efekto di su komportashon. Inseguridat ta pone ku e hende ta reakshoná tin bia mas fuerte ku e lo tabata ke realmente pasobra no ta atmití (e direktor i komisario) ku e no sa algu. Nan ta kere ku nan mester sa tur kos, loke ta un fout.

Strès ta kousa malesa

Den e charla di awe Sharon lo duna informashon kiko ta strès, e lo laga mira kiko e ta okashoná, kiko e ta duna komo reakshon riba nos kurpa, e malesanan ku e ta okashoná. Strès tin hopi influensia riba por  ehèmpel atake, pasobra e hende tin hopi tenshon. “Nos mester sa kiko nos ta hasi ku nos mes dor di laga e strès subi”. E lo splika e hendenan kiko pa hasi. Kada ken ta disidí pa su mes i e lo duna e hèrmèntnan pa sa kiko por hasi. Sharon a bisa ta importante pa un biaha pa dia kana 30 minüt loke ta baha strès enormemente. “Si bo no ta tuma tempu pa bo mes, ken ta tuma tempu pa bo”, Sharon a enfatisá.

Otro malesanan ku Sharon a menshoná ta problemanan ku kurason, malesa di suku, e tin di aber ku hopi malesa pasobra e hende ta pone preshon riba su kurpa asina fuerte ku e ta haña señalnan ku e ta neglishá. E no tin atenshon pa su mes kurpa.

Charla awe

E charla ta awe na Renaissance den e sala di konferensia i e ta kompletamente grátis. Lo duna algu di kome i bebe i ta dura di 7 pa 8 or pero registrashon ta mitar di 7. No por evitá strès kompleto pero kada hende por yuda su mes i p’esei ta importante e charla awe organisá pa Benu Pharmacy.