WILLEMSTAD.- Un studiante 19 aña ta sali di bon for di sala di korte pa transporte kokaina. Riba 19 di aprel último, outoridatnan a hasi kontròl na un kompania di kargo ku asistensia di ‘kachó di droga’ ku a señalá un kaha sospechoso ku algun joya i chichi, aden. Na momentu ku a bora esaki a bin haña 131 gram droga aden.
E akusado J. Suriel (19) a presentá den sala di korte ayera, sin representashon di su abogado i a duna di konosé ku ta for di dia ku polis a interog’é na warda, el a mira su abogado. El a atmití den sala di korte, ku el a pòst e kaha aki, pero ku e no por imaginá ku e kaha lo tabatin droga aden. Mas ainda pasó el mira e kontenido di e kaha promé ku nan a ser’é. E ta indiká di ta hopi rabiá ku su amigu ku a pidié e fabor di pòst e kaha aki. El a splika ku e amigu, ku ya no ta su amigu mas aworakí, ta biba na Hulanda i tabata ku vakashon na Kòrsou. Ora fiskal di Ministerio Públiko a puntr’é ku e no ta haña ta straño ku un hende ku ta biba na Hulanda ke pòst un kaha pa Hulanda si e mes lo tin ku bai bèk Hulanda. E akusado a kontestá ku e amigu a bis’é ku e mes no por pòst pasó e no ta inskribí aki na Kòrsou. I e ku no tin eksperensia ku pòst pakete. El a kere su amigu.
Fiskal a puntra e akusado dikon el a bèl ‘BobCat’ pa sa si e pakete a yega su destinashon, si e no tabata na altura ku tabatin droga den e kaha. E akusado a splika ku despues ku el a pòst e kaha, e no a tende nunka mas di su amigu i komo hende e kier a sa si e pakete a yega Hulanda. “E no a bèl mi manera e sa hasi normalmente i tampoko no a kontestá mi appnan mas”. Fiskal a puntra e akusado kiko e ke men ku ‘normalmente’ indikando ku esaki ta parse manera ku e ta hasi e tipo di echonan aki promé huntu ku e amigu, di kua e akusado ta ninga. E deklarashonnan di e akusado ta inkonsistente i dudoso, pasó e mes a ‘schiet voor’ e sèn pa pòst e kaha pa su amigu i nunka e no a duna hustisia number di telefòn di e amigu. E akusado a reakshoná bisando ku su amigu a dun’é e sèn ku el a ‘schiet voor’ siguiente dia bek i pa loke ta trata e number di telefòn, su selular a ‘wipe’ e number di su amigu. El a indiká ku e úniko number di telefòn ku e tin ta number di e frei di su amigu, ku lo mester a risibí e pòst na Hulanda. E la sigui bisa ku e number aki ta e mesun number ku tabata skibi riba e kaha i ku e no tin nada di skonde.
Fiskal ta haña ku e akusado a hasi e echo aki intenshonalmente i ta splika ku un kastigu pa e tipo di echonan aki, normalmente ta di 6 luna di kua 3 ta kondishonal. Fiskal a tene kuenta ku e edat di e akusado i e echo ku e ta un studiante i a demandá un kastigu di 3 luna kondishonal mas un kastigu di trabou di 120 ora di trabou obligatorio komunitario, ku 3 aña di prueba.
Wes den su sentensia a bisa ku pa un gran parti e ta di akuerdo ku fiskal ku e historia di e akusado ta straño, pero ku no tin prueba tampoko ku e tabatin intenshon den e echo aki. I e echo ku ta trata di un kantidat chikí di droga ku un peso abou, ta duna kredibilidat ku e akusado maske ku el a wak e kontenido di e kaha, por a keda sin por a tuma nota di e droga. Wes a sera e kaso i a tuma desishon di apsolvé e akusado di intenshon i ta dun’é un kastigu di 120 ora di trabou obligatorio, kompletamente kondishonal, ku 2 aña di prueba. Wes ta bisa e akusado ku e mester laga e kastigu aki sirbi komo un atvertensia p’e pa den futuro pone mas atenshon na kiko e ta pòst.
