WILLEMSTAD.-  Resientemente durante kasonan di droga, vários mula a presentá den sala di korte pa nan kaso keda tratá. Entre nan e akusado T.P. (22) ku ta wòrdu akusá di kier a transportá 1100 gram di koka den un maleta pa Hulanda. T.P. a presentá den sala pa responsabilisá su mes pa su akto. El a insistí ku ta e mes a drecha su maleta i ku ta imposibel tabatin droga den e maleta.

Segun e akusado, e tabata bayendo Hulanda pa su estudio i hamas por a hinka den su kabes pa transportá e droga. El a bisa di kier a bai keda serka un primu di dje, pa despues e sigui su rumbo. El a splika hues ku semper el a traha i nunka a hañ’é den problema ku hustisia. Segun e akusado e no tabata den nesesidat di sèn pa el a bai pasa droga pasó e  tin su trabou.

El a bisa ku e no tabatin droga den su maleta. Segun e akusado el a “check in” na bali sin niun problema. Ora  el a pasa screening” i  tabata kla pa abordá, duana a busk’é i bai kuné. Mas aleu el a duna di konos’é  ku ora el a yega abou, duana a mustr’é e maleta  pa  despues bora e rantnan i saka puiru blanku.

Segun e prosèsverbal di duana, e leim na e maleta tabata  mustra resien hasí, pa motibu ku e momento ei ainda  e tabata muhá. E akusado a splika ku el a keda sorprendí ora el a mira e droga sali fo’i su maleta. El a indiká ku el a asta seya su maleta ora el a “check in”, p’esei no por komprondé kiko a bai robes.

Fiskal  durante su rekisitorio a  bisa ku e no ta kere e historia di T.P. mes. Fiskal a bisa ku awor e akusado ke trata na benta e falta riba otro hende, pero e loke e ke laga aparentá no ta kuadra. Tambe fiskal a duna di konos’é ku e akusado a deklará  henteramente otro  kos den prinsipio.

Mirando esakinan fiskal a bisa di ta duna e akusado un chèns i a hasi un demanda di 12 luna kondishonal mas 240 ora di trabou pa komunidat.

Hues den su desishon tambe a bisa di no a kere e historia i ta bai di akuerdo ku e demanda di fiskal.