WILLEMSTAD.-Na e skol sekundario Maria College den área di Santa Helena, Otrobanda, tin un situashon basta ferfelu na e momentunan aki.  Informashon ku EXTRA ta disponé di dje ta indiká ku tur mucha i tambe tur dosente di e skol ta pafó di kurá. Skol mester a kuminsá for di mitar di ocho manera kustumber, pero portanan di skol ta sera i tur hende ta pafó. Hóbennan ku EXTRA a logra papia kuné a splika ku tin malkontentu den direkshon di e direktor di skol. Un grupo di hóben no ke e kabes di skol i a sera kabes pa manifestá esaki.

EXTRA a logra haña un imágennan ku a pinta mensahenan bastante mahos riba murayanan di e skol. Esaki supuestamente lo mester ta motibu di preokupashon serka dosentenan pasobra a konsiderá e mensahenan aki komo menasa. Pues te ainda tur mucha i dosente ta pafó di skol. EXTRA a buska kontakto ku direktor di Direktiva di Skol Katóliko, pero te na e momentunan aki e no tabata disponibel pa un komentario.  Meskos tambe EXTRA a buska kontakto ku presidente di Sitek pa wak si su miembronan a buska su asistensia pa e parti di menasa, pero e tambe no tabata alkansabel. Mas detaye den edishon di EXTRA.