WILLEMSTAD.- Hopi di esnan ku haña but den tráfiko, ta bin korte pa purba konvensé hues dikon nan no ta di akuerdo ku e but i mayoria bia ta sali benefisioso.
Den e kaso aki un hóben studiante (22) a presentá den sala, pa splika dikon e no ta di akuerdo ku e but ku el a risibí. E studiante a haña 3 but i a bisa ku e no por paga nan. E ta keda akusá di a kore outo sin seguro, sin plachi number pagá i e dokumento di kùr no tabata válido, ku a suma un total di 1000 florin. El a splika korte ku e outo no ta di dje, pero di su mama. Segun e shofùr e dia ei, el a sali kas pa bai kumpra kos na un toko djis den serkania. Komo ku tabata djis band’i kas, el disidí di bai ku e outo, paso awa tabata kai. Na momento ku el a dobla bògt el a topa ku un vehíkulo di polis ku a par’e pa kontrolá e papelnan.
Mirando ku esakinan no tabata na òrdu, el a haña 3 but. E shofùr a splika ku ainda e ta bai skol i no ta traha, pues no por paga e butnan. Fiskal na su turno a bisa ku kada ken ku disidí di bai kore un vehíkulo ku por ta di ken ku ta, e ta esun responsabel pa outo na e momentonan ei. Segun fiskal, na vários okashon el a splika ku mester kontrolá papelnan di vehíkulo promé ku subi kaya kuné.
Fiskal a splik’e ku pa kore outo sin seguro so ta fl 500,- di but i e otronan 250 florin pa kada un ku ta suma un total di fl 1000,- di but.
Pero mirando su situashon personal i e ta un studiante, fiskal ta hasi 500 florin kondishonal i e tin ku paga solamente 250 florin ku un periodo di prueba di 2 aña.
Esei ta nifiká ku durante dos aña, e bolbe kometé kualke infrakshon di tráfiko, e orei si e mester paga tur kos mas e but di 500 florin ku ta kologá riba su kabes.
Hues den su desishon a haña e demanda di fiskal na su lugá.