WILLEMSTAD.- Un hóben studiante a keda akusá pa dos echo penal den su kontra. Ta trata di e akusado J.B. (21) akusá di a kumpra un telefòn hòrtá i poseshon  di mariwana.

Segun e akusashon, despues di e ladronisia polisnan ku a hasi un investigashon a lokalisá e telefòn via un sistema ku tin instalá den e mobil, ku a resultá na kas di e akusado.

Polis a tene un entrada hudisial na kas di e hóben i a haña e telefòn marka iPhone i tambe un kantidat di 51 gram di mariwana.

E akusado a bisa ku el a kumpra e telefòn serka un hende ku tabata kore bende e telefòn den su bario. Segun e akusado, el a kumpra e telefòn pa 1500 florin.

Fiskal i wes a keda straño, pa motibu ku ta trata di un hóben studiante i un montante asin’ei ta hopi sèn pa un mucha di skol.

Pa loke ta trata e mariwana di e akusado a bisa ku el a hañ’é bentá abou banda di su kas.

El a mira algu straño i ora el bai kue el a tuma nota ku ta trata di droga.

Wes a puntr’é dikon e no a yama polis òf hib’é warda, e akusado a bisa ku debí ku den pasado el a kai den man di hustisia, e tabatin miedu di yama polis.

Fiskal durante su rekisitorio a duna di konosé ku mirando ku e akusado a paga kèsh pa e telefòn sin tin un trabou figo, e por pensa ku e sèn tin di aber ku sírkulo kriminal.

Fiskal ta akusá e studiante pa inkubrimentu di kos hòrtá i tambe pa poseshon di mariwana. Fiskal ta yega na un demanda di 6 luna di kual 2 kondishonal.

Segun rapòrt di Reclassering, e akusado ta wòrdu influensiá hopi fásil pa amigunan i ta kana ku amigunan  robes.

Pero banda di esaki e ta siña bon na skol i su lastu rapòrt tabatin solamente bon punto.

Wes a bisa e akusado ku e ta lamentá ku e ta bolbe hinka su mes den problema siendo ku su puntonan ta ekselente na skol.

Wes den su desishon ta desviá for di e demanda di fiskal i a kondená e akusado na 240 dia di kual 191 kondishonal ku un periodo di prueba di 3 aña mas guia di Reclassering.

Komo kastigu adishonal, Wes a imponé 120 ora di trabou pa komunidat.