WILLEMSTAD,- Ayera na Tera Kòrá tabatin presentashon di trabou di studiantenan di Universidat di Kòrsou (UoC) den kuadro di e trabounan di e di 10 Fondo pa Desaroyo Europeo. Studiantenan di fakultat tékniko a kolaborá ku Gobièrnu di Kòrsou pa kreashon di e área di rekreo nobo den bario di Tera Kòrá.

Minister di Tráfiko, Transporte i Planifikashon Urbano, Zita Jesus-Leito,  tabata presente durante presentashon di trabou. Jesus-Leito a splika ku e tabata kontentu ku e studiantenan di UoC pa loke ta e práktika durante e siman ku a pasa. Huntu ku studiantenan di Fransia, di Kòrsou i di Colombia, studiantenan di Kòrsou a sinta huntu i planifiká. Minister Jesus-Leito a splika ku na Tera Kòrá ‘lo bin un parke kaminda por tin oportunidat pa nos hendenan por rekreá, espesialmente e hende di bario di Tera Kòrá. Pero tur hende di Kòrsou ta bon biní. Hende grandi, mucha yòn, tur hende.’ Ayera e studiantenan a presentá algun parti di e proyektonan.

Dekano di “Faculteit der Technische Wetenschappen” di Universidat di Kòrsou, sr. Ergün Erkoçu, a splika ku durante e siman e estudiantenan a traha “design build”. ‘Djaluna pasá nos a kuminsá ku diseñá di e parke i tambe a disidí nos plan pa henter e siman. Huntu ku e studiantenan for di Kòrsou, Colombia, Fransia i Ulanda durante e otro dianan nos a konstruí algun partinan di e parke.’ Minister Jesus-Leito a enfatisá ku e proyekto na Tera Kòrá ta un proyekto ku a haña fondo for di Union Oropeo. Jesus-Leito: ‘Ta di e di 10 Fondo pa Desaroyo Europeo. I nos ta hasi bon uso di dje.’