WILLEMSTAD.- Despues di algun luna di preparashon i guia, e aña akí Stichting Studiefinanciering Curaçao (SSC) tin 160 studiante ta bai sigui nan estudio na Ulanda. Riba djadumingu 27 di yüli 2025, un total di 142 studiante lo biaha riba e buelo KL 736 di KLM. Diesocho studiante ya a biaha pa Hulanda i lo topa e grupo grandi durante e siman di risibimentu i instalashon.

Detaye di buelo:

Fecha: djadumingu, 27 di yüli 2025;

Lugá : Aeropuerto Hato

‘Check-in’: kuminsando for di 13:45 na bali di KLM

‘Deadline’ pa ta den sala di salida: 16:00

Salida di buelo: 18:00

Yegada na Hulanda: 28 di yüli 2025, 09:05.

SSC ta splika ku na  yegada, tur studiante lo keda risibí pa nan mèntòr. Den diferente bùs lo hiba e studiantenan pa nan siudat kaminda nan ta bai biba. Apesar di e situashon difísil di kamber na Hulanda, tur studiante ku a pidi SSC, a haña un kamber pa e promé aña di nan estudio.
SSC ke ekspresá su gradisimentu na e studiantenan i nan mayornan ku a konfia SSC pa finansiá nan estudio i guia nan riba e ruta di éksito. Un gradisimentu spesial tambe na gobièrnu di Kòrsou, Banko sentral di Kòrsou i Sint Maarten, Ministerio di Hustisia, departamento di prevenshon di polis, Kranshi, Voogdijraad Curaçao, GMN, KLM, tur outoridat di aeropuerto, representashon di Ulanda, Café Barista, sikólogo Gullita Anthony, Kontentu Media, ICUC i tim di SSC Hulanda i Kòrsou.

SSC ta deseá tur studiante hopi éksito ku nan estudio i ku pronto nan por bolbe Kòrsou pa trabou.