WILLEMSTAD.-  For di djárason dia 26 di yüli te awe 2 di ougùstùs, un grupo di 10 studiante di arkitektura  i ingenieria sivil di fakultat di siensia tékniko FdTW di Universidat di Kòrsou (UoC) ta hasiendo un proyekto di distrito di Nieuw Nederland. E aktividat ta tumando lugá bou di supervishon di Benjamin Visser i Ergun Erkocu.

E aña aki e tema di siman di proyekto ta “kana dor di Nieuw Nederland”. Ta trata di un tarea di diseño i konstrukshon kaminda e studiantenan lo diseñá i implementá intervenshonnan den poko tempu ku ta promové e interakshon entre abitantenan di Nieuw Nederland i e invitadonan inkluyendo turistanan den Nieuw Nederland. E intervenshonnan lo sòru pa invitá i stimulá hende pa kana den e bario, na e kosta i dor di diferente inisiativanan den bisindario, generando asina interakshon. E hospitalidat i seguridat ta primordial aki nan.

Ademas e studiantenan lo realisá un intervenshon bèrdè i solar den lugánan ku ainda no a konosé esakinan. E forma di hardin aki tin komo ophetivo pa krea konsenshi riba e efektonan positivo di mas vegetashon den e bisindario i e retenshon i almasenamentu di awa. Ta importante pa mustra kon fásil ta pa kultivá den e bisindario ku propósito pa fruta i berdura i ku tambe por provoká un kaida di temperatura medio den e bario.

Den wikènt pasa e studiantenan a tuma parti tambe na e proyekto di Cura Doet. Awe djaluna e proyektonan lo keda kla i entregá na e bario.