WILLEMSTAD.- Djamars 15 i djaweps 16 di novèmber benidero, WTC lo ta e esenario kaminda grandi i chikitu lo eksperensiá un biahe eksplorativo, interaktivo i inspirativo den mundu dinámiko di teknologia ku yudansa di diferente instituto edukashonal, kompania lokal i internashonal ku lo ta presente. E organisashonnan akí ta hunga un ròl krusial den e formashon i tambe den krea oportunidatnan pa hóbennan pa futuro.

Pues ta di gran importansia pa studiantenan ku ta yegando na e punto pa tuma e desishon grandi pa loke ta nan futuro huntu ku nan mayornan òf guia pa bishitá e feria akí.

Mundu ta desaroyando den tur área. Nos manera di mira bida, presente i futuro tambe a kambia di un manera revolushonario. Kòrsou komo parti di e mundu akí, isla chikitu pero ku ta kla pa ta kompetitivo ku mundu henter den tur área, tambe ta dal pasonan grandi na un futuro briante, kaminda teknologia ta e base.

Kolaborashon  Ku Ministerio di Desaroyo Ekonómiko di Kòrsou

Merkado di Estudio i Karera di Kòrsou (studie en beroepenmarkt) den su di 29 edishon ta uni pa promé biaha ku Ministerio di Desaroyo Ekonómiko pa organisá e feria di e aña akí ku ta hiba komo título: E Poder di Teknologia - Formando nos Futuro (The Power of Technology - Shaping Futures). E union di e dos identidatnan akí pa organisá nos feria anual ta mustra ku e tema di Teknologia ta importante pa okupá nos mes kuné.

E kolaborashon akí ta trese un nivel di inovashon na e feria, ku ta amplifiká potensial pa un impakto ku hopi nifikashon.

PODER DI TEKNOLOGIA

Minister di Desaroyo Ekonómiko di Kòrsou den su afan pa kumpli ku su responsabilidat pa stimulá e kresementu ekonómiko di Kòrsou i dirigí nos pais riba un ruta klaro di desaroyo ekonómiko, manera ta deskribí den strategia di Eksportashon Nashonal, kier hasi nos siguiente generashon konsiente atrabes di nos feria ku Kòrsou ta disponé di tur elemento nesesario pa bira un hub digital pa e region. Tantu su ubikashon ku ta bon pa tuma benefisio di kresementu fuerte global den demanda pa servisio di teknologia di informashon, pero tambe den e konosementu di su yunan bon prepará pa atendé ku kualkier reto teknológiko ku presentá.

Dia 14 di Novèmber lo tin un pènel di diskushon. Tema ta: Trabounan di futuro den e sektornan di 'Ekologia, Teknologia, Edukashon i Medisina.'
E pènel ta konsistí di Proteus, Simia, Caristat i Vrije Universiteit Amsterdam(VU). Panelistanan ta: Lisa Marcocchino (Proteus), Andrew Solomon (Simia), Guido Rojer Jr (Caristat) i Mae Yu Jesserun (VU).
Karchi ta fl50,- i ta obtenibel pronto via wèpsait www.studyfaircuracao.com /CxPay

Tokante Merkado di Estudio I karera Kòrsou

Merkado di Estudio i Karera di Kòrsou su responsabilidat ta pa sòru pa tur studiantenan di skolnan sekundario den nan di 3, 4 òf 5 aña eskolar (VWO, HAVO, SBO, VSBO i AGO) i tambe nan mayornan òf konseheronan haña kaminda pa WTC pa por risibí un variedat amplio di informashon kaminda studiantenan gratuitamente ta siña mas tokante kiko tur nan oportunidatnan nan ta, kiko ta nan opshonnan ora nan sigui ku un estudio i ki opshon di trabou tin despues.

Tur esaki danki na representashon di diferente kompania den diferente sektor, skol i universidat ku ta kla pa duna tur informashon pa yuda bo hasi bo soñonan realidat i tambe kon pa manehá bo tempu.

Si tin kualke kompania, skol òf universidat ku ainda no ta parti di e gran feria akí, por tene kontakto ainda ku nos pa registrá i yuda den formashon di nos siguiente generashon.

Fecha: 15 i 16 di novèmber 2023

Orario:             08:00 - 13:00 (bishita via skol)

17:00 - 21:00 (pa studiantenan, mayornan i buskadó di trabou)

Lugá:               World Trade Centre Kòrsou

Website: www.studyfaircuracao.com

Organisashon:

Mon Art: Daisy Casimiri

Bou di ouspisio di Kámara di Komersio Kòrsou.

d Curaçao