WILLEMSTAD.- Importashon i korementu di outo ku stürwil na man drechi ya no ta punto di diskushon na Europa. Korte Europeo a tuma e desishon ku vehíkulonan ku stürwil na man drechi por ser akseptá pa hasi uso di vianan públiko den henter e kontinente. E kaso aki ta unu ku a bai den korte despues ku tantu Polonia komo Lituania a pone prohibishon pa entrada di e vehíkulonan aki. Ningun di e dos paisnan no por  proba di un manera konvisente ku stürwil na man drechi lo tin impakto negativo riba seguridat den tráfiko. T’asina ku Komishon Europeo a pidi korte pa deklará e dos paisnan inaksesibel den nan ponensianan, i ku lo por permití e tipo di vehíkulonan aki, sea nan ta nobo òf ku nan ta segunda mano.

T’asina ku na 2008 e Komishon Europeo a risibí un seri di reklamo di hendenan ku tabata deseá di registrá outonan di pasahero na Polonia. Tabata vehíkulonan prosedente di Reino Uní i Irlanda. A trata di hendenan di orígen Polako ku tabata praktiká un aktividat profeshonal den e estadonan miembro. Nan tabata deseá di registrá nan vehíkulo na momentu ku nan regresá Polonia. Sinembargo, a base di leinan polako nan tabatin e obligashon di kambia e stürwil dje vehíkulo pa banda robes, kual ta un modifikashon hopi kompliká i ku no tabata bale la pena hasi tur e gastunan ei

Di otro banda, leinan di Union Europeo ta bisa si ku, pa e propósito di establesimentu i operashon di e merkado interno dje komunidat aki, ta apropiá pa remplasá e sistemanan di aprobashon dje estadonan miembro i bini ku un prosedura di aprobashon di komunidat basá riba e prinsipio di harmonisashon. E elementonan tékniko ku ta aplikabel riba e sistema, komponentenan, unidatnan tékniko separá i vehíkulonan mester ser harmonisá i spesifiká den leinan regulatorio. Pero e leinan regulatorio ei den promé instante mester buska pa sigurá un nivel haltu di seguridat riba kaminda, protekshon di salú, protekshon medioambiental, efisiensia riba energia i protekshon kontra uso no outorisá.

E meta prinsipal di e aprobashon legislativo dje vehíkulonan ta pa sigurá ku vehíkulonan nobo, komponentenan i unidatnan tékniko separá poné riba merkado ta sòru pa un alto nivel di seguridat i protekshon di medio ambiente. Esaki no mester ta un problema na momentu ku e vehíkulonan aki subi merkado. Medidanan apropiá mester ser tumá pa ta sigur ku tin piesa i otro ekiponan disponibel na momentu di drecha un vehíkulo.