Entre otro por bai landa mainta i 25 hende na entiero

WILLEMSTAD.-Premier Eugene Rhuggenaath a anunsiá algun suavisashon pa loke ta trata medidanan den kuadro di esfuersonan pa kombatí mas plamamentu di Corona vírus. Premier a mustra ku te ainda tin hopi preshon riba hospital loke ta indikativo ku e situashon ta di preokupashon. Kuido intensivo ta hopi okupá ainda, pues kada momentu tur hende mester ta konsiente ku kada bia ku suavisá esei por trese e riesgo pa oumentu di kontagio. Mester sigui kuida, asina premier a duna di konosé.

Pa loke ta trata e parti di suavisashon, premier a bisa ku pa promove salu físiko i salu mental ta permití a hende bai landa mainta entre 4:30 te 8’or di mainta. Esaki no ta un invitashon pa tur hende bai laman pareu. Esei por tuma lugá segun plachi di dia.

Ta suavisá medidanan den kuadro di ekonomia tambe, anto entrante djarason 21 di aprel restorantnan ku tin e fasilidat pa brinda servisio drive-thru por hasi esei te 6’or atardi. Kliente no por baha for di outo niun momentu i klientenan por bai solamente segun plachi di dia. Tur otro restorant por hasi entrega (delivery) te 8’or di anochi. Pues a duna mas ora pa restorantnan hasi entrega. Ta nifiká si ku e trahadó tin te 9’or pa yega kas. Trùk di pan tambe por hasi delivery te 8’or pero sòru pa e trahadó yega kas pa 9’or.

Teniendo kuenta ku hendenan ta na kas i ke hasi trabounan na kas, awor hardware tambe por habri pero kliente no por baha for di outo. Kliente mester yama, òf hasi pedido online i basa riba orario indiká por bai buska e merkansia. Esaki tambe ta segun plachi di dia.

Pa loke ta trata entiero premier a anunsiá ku na lugá di 10 persona so na e entiero a hasi e kambio ku na un entiero un maksimo di 25 persona por asistí, pero paden si ta un maksimo di 10 persona so. Premier a sigui enfatisá ku solamente si tur hende sigui kuida nan mes i kuida otro i ku sifranan baha por bai relahá mas. Ademas ta keda e rekomendashon pa bakuna. Mas detaye den edishon di EXTRA.