Hopi víktima den aksidente no ta haña nan daño pagá

WILLEMSTAD.-E di sinku luna di aña 2022 a kuminsá i ya kaba e kantidat di aksidentenan di tráfiko a sòru pa vários morto i un gran kantidat di hende ku a sufri leshon. Komunidat ta tende solamente di e kasonan fatal, pero e kantidat di hendenan ku ta sufri daño serio ta muchu mas tantu. E situashon ainda mas tristu ta ku hopi bia ta sosodé ku hendenan ku a sufri daño den un aksidente no ta haña pago pa e daño ku nan a sufri. Na palabra abogado Pols di e bufete Braam & Pols.

Abogado Pols ta spesialisá den ‘letselschade’. Den kombersashon ku EXTRA el a splika ku na Kòrsou ainda seguronan di outo ta kubri daño te un maksimo di 150.000 florin. Den kaso ku un víktima entregá un claim pa daño personal hopi lihé e suma aki ta kaba i no por sigui brinda e persona kuido mas.  Mester kuminsá pensa pa trese ahuste den e montante aki.

...Abogado mr. Richard Pols, eksperto den kasonan di leshon durante aksidente di tráfiko...

Gastunan médiko so ta kaba e montante di 150.000 florin, ku e seguro ta kubri, hopi lihé. Ta bini aserka ku outonan ta muchu mas kostoso awendia. Pues e suma di 150.000 florin definitivamente no ta kuadra den e tempu aki mas, asina Pols a enfatisá.

E abogado ta sugerí pa hisa e suma sigurá te na 1 mion florin pa kada vehíkulo. Komo abogado spesialista pa atendé daño sr. Pols ta mustra ku den kaso di un aksidente di tráfiko den kua tin dos persona ku a sufri leshon hopi serio, pa kua nan ta bai tin mester di kuido spesialisá pa un tempu largu òf nan no por traha mas, e hende mester por tin e derecho pa kobra e daño ku el a sufri.

Riba e pregunta di EXTRA a base di kiko ta stipulá si ta 1 mion ta sufisiente òf si mester di mas abogado Pols a duna di konosé ku kompanianan di seguro mester hasi nan kalkulashon kuantu prima mester subi pa kubri e daño na víktimanan ku tin leshon supstansial. Kisas tin mester di un komishon ku ta yuda hasi e kalkulashon. Pols ta mustra ku hopi bia hendenan embolbi den aksidente no ta haña nan daño kompletamente pagá. Na Hulanda kada vehíkulo ta sigurá pa daño pa entre 2 pa 3 mion euro. Den Karibe ulandes e ta apénas 150.000 florin. Mas i mas por tuma nota ku despues di aksidentenan di tráfiko sea hendenan ta pèrdè nan bida i ta laga famia den problema serio atras òf nan ta keda ku leshon serio ku ta stroba nan di sigui hiba un bida normal.

Na Kòrsou tin vários kaso ku meresé atenshon, pues no ta solamente den tráfiko pero tambe riba kaya. Por ehèmpel tin vários área publiko kaminda tin tegelnan di kaya ku ta kibra. Ta importante pa drecha e situashonnan aki òf pone indikashon bon kla pa evitá posibel claim di turistanan. Kompanianan ni asosiashon di seguro no tabata apto pa duna komentario riba e artikulo aki. (foto file)