WILLEMSTAD.- Nèt promé ku Pasku, Minister Ruthmilda Larmonie-Cecilia di Desaroyo Sosial, Labor i Bienestar, i Minister Presidente Gilmar Pisas a firma e reglamentu ministerial pa subi e salario mínimo. Debí na esaki, salario mínimo lo subi ku 5,4%, for di NAf. 10,70 pa NAf. 11,28 bruto pa ora, desde 1 di yanüari 2024.
E motibu di e subida di salario mínimo ta e índise di preis di konsumo, manera a wòrdu establesé pa e ‘Centraal Bureau voor de Statistiek’ pa Kòrsou. E komparashon ku e sifra di ougùstùs 2022, e índise a subi ku 5,4% na ougùstùs 2023. Basá riba esaki, a disidí pa subi salario mínimo ku mesun porsentahe, kual ta resultá den un suma di NAf. 0,58 pa ora.
Minister Ruthmilda Larmonie-Cecilia di SOAW ta kontentu ku salario mínimo tambe ta wòrdu oumentá pa 2024. ‘Nos mester pèrkurá ku e salario tambe ta krese konforme e oumentonan di bida básiko,’ segun Larmonie-Cecilia. E último publikashon ofisial di salario mínimo a wòrdu publiká dia 22 di desèmber 2023.
