WILLEMSTAD.- Un di e metanan di e Gobièrnu aktual pa logra un poblashon mas salú i hasi nos poblashon mas konsiente di e konsekuensianan di sobrepeso òf “Obesitas”. E meta ta pa stimulá siudadanonan pa kome mas salú i move mas. Tambe programanan di konsientisashon via medionan sosial mester informá komunidat kon pa hiba un bida mas saludabel. Esei di akuerdo ku sra. Elsa Ronzendal durante e reunion públiko di ayera mainta.

Di akuerdo ku Rozendal, segun sifranan publiká den un rapòrt di 2014 di “Volksgezondheid Instituut Curaçao”, 62.6% di hende hòmber na Kòrsou, esta 32.148 hende hòmber ta sufri di “Obesitas”. Di e hende muhénan, 67.3%, esta 43.941 ta sufri di “Obesitas”. Esaki ta nifiká ku 76.089 hende ta sufri di “Obesitas”. “Obesitas” ta kousa hopi malestar i malesa. Aparte ku e persona hopi biaha no ta sintié kómodo ku su aparensia e por sufri tambe di malesanan manera, Preshon haltu, Diabetis i Kolesteròl.

E malesanan aki ta kosta nos komunidat i Gobièrnu di Kòrsou hopi plaka anualmente. P’esei Elsa Rozendal ta di opinion ku Gobièrnu mester bini, aparte di programanan di konsientisashon, tambe ku insentivonan pa yuda i stimulá hende pa baha di peso. Segun Rozendal si Gobièrnu paga e hende pa e baha di peso, esaki por stimul’é pa baha di peso mas lihé i spar Gobièrnu hopi plaka.

Un estudio di “Mayo Clinic” na Merka a mustra ku hendenan ku keda ofresé plaka pa baha di peso, mas lihé ta motivá pa baha di peso. Den e programa di “Mayo Clinic” e partisipantenan a haña plaka pa baha di peso pero si nan no kumpli, nan mester paga bek.

Dr. Roshini Raj di “Mayo Clinic” ta satisfecho ku e eksperimento. E ta bisa ku e ser humano su serebro ta respondé bon na insentivo i rekompensa. E dòkter a sigui bisa “e echo ku un hende sa ku bahamentu di peso ta dun’é un bida i kurpa mas saludabel i liber di malesanan, mester ta un rekompensa riba su mes, pero e ser humano ta gusta plaka i ta algu ku e ta sinti di biaha unabes e tin e plaka den su saku”.

Segun Rozendal, Gobièrnu di Kòrsou mester konsiderá e insentivo aki i hasi e estudionan nesesario pa kalkulá kuantu plaka esaki lo por spar Gobièrnu si hopi hende baha di peso i biba mas saludabel.