WILLEMSTAD.- Suministro di remedi nesesario, manera por ehèmpel insulina, por ta den peliger den nos pais. Asina Asosashon di Botikarionan a informá. Importadornan di remedi ta eksihí pa botikanan paga nan remedi inmediatamente, miéntras ku SVB ta paga e botikarionan den entre seis i ocho siman. Konsekuentemente e botikanan mester prefinansiá. Pero nan no tin sufisiente likides. Asina
Rob de Wolf, ku ta presidente di Asosashon di Botikarionan, a bisa. El a splika ku tin un importadó ku ta bisa ku botikanan tin ku paga sèn kèsh òf paga via banko. Nan no ta entregá e remedi si nan no haña e sèn riba nan kuenta bankario. Segun De Wolf esaki no ta kustumber den e relashon entre importadó i botikanan.
El a splika ku ta trata tokante entre otro insulina, ku ta un nesesidat pa sierto pashèntnan. ‘Tin hopi hende na Kòrsou ku ta usa insulina.’ Segun De Wolf, debí na e situashon ku botikanan tin ku prefinansiá e remedi - I hopi di nan no tin sufisiente likides - e disponibilidat por bira ménos. ‘Si nos no tin e sèn riba nos kuenta bankario, nos no por kumpra e remedi.’
Importadornan ta bisa ku e situashon no ta nada straño. Si bo ta bai supermerkado, bo tin ku paga direktamente tambe. De Wolf: ‘Pero SVB ta paga seis te ocho siman despues ku nos a entregá un deklarashon. Komo konsekuensia nos tin ku prefinansiá pa dos luna largu. Tin importadó ku ta un tiki ménos severo. Pero si nan no ta wòrdu paga den un periodo di dos siman, nan ta stòp di entregá tambe.’
Segun De Wolf henter e situashon lo tin konsekuensia pa disponibilidat di remedi, en espesial remedi ku ta bastante karu. Segun De Wolf tin diferente botika ku tin problema ku pagamentu kaba. Komo konsekuensia e botikanan no tin tur remedi mas na stòk. Segun De Wolf si nada ta kambia lo tin problema ku disponibilidat di remedinan karu rònt henter Kòrsou.