WILLEMSTAD.- Un enkuesta ku Ombudsman a hasi resientemente riba derechi di awa limpi a sali na kla ku un gran mayoria ke pa supsidiá awa pa hende di ménos rekurso i asina por garantisá ku nan tin disponibilidat na awa limpi.

Ombudsman di Kòrsou resientemente a finalisá un enkuesta “online” relashoná ku e derechi riba awa limpi na Kòrsou. Pa medio di diferente pregunta kòrtiku, a purba haña informashon tokante kon e siudadano ta eksperensiá e ròl di gobièrnu den ehekushon di e derecho aki. Ehèmpelnan di algun di e preguntanan ku Ombudsman a hasi, ta si gobièrnu ta hasi sufisiente pa garantisá ku siudadanonan di ménos rekurso tin akseso na awa limpi. Partisipashon na e enkuesta tabata anónimo i e resultadonan entretantu ta disponibel riba e wèpsait di Ombudsman. E resultado final di e enkuesta a keda entregá na gobièrnu di Kòrsou.

Resultado enkuesta

Akseso na awa limpi ta importante pa e ser humano; 513 di akuerdo i 2 parsialmente di akuerdo.

Ta tarea di gobièrnu pa garantisá ku tur siudadano tin sufisiente akseso na awa limpi; 492 di akuerdo, 2 no di akuerdo, 19 parsialmente di akuerdo.

Den práktika gobièrnu ta hasi sufisiente pa garantisá ku siudadanonan di ménos rekurso tin akseso na awa limpi; 90 ta di kuerdo, 205 no di akuerdo, 148 parsialmente di akuerdo i 69 no tin opinion.

Supsidiá pago di resibu di siudadanonan di ménos rekurso ta garantisá ku e siudadanonan aki tin sufisiente akseso na awa limpi; 302 ta di akuerdo, 68 no ta di akuerdo, 117 parsialmente di akuerdo i 26 no tin opinion.

Traha un lei ku ta stipulá por ehèmpel ku tur luna e siudadano di ménos rekurso ta risibí un kantidat grátis di awa limpi, tin un balor agregá;  378 di akuerdo, 50 no ta akuerdo, 74 parsialmente di akuerdo i 12 no tin opinion.

Kontinuashon di e produkshon i distribushon di awa limpi ta dependé di e disponibilidat di medionan finansiero; 283 di akuerdo, 130 no ta di akuerdo, 69 parsialmente di akuerdo, 30 no tin opinion.

Hasi ganashi ta importante pa e kontinuashon di produkshon i distribushon di awa limpi; 96 di akuerdo, 285 no ta di akuerdo, 113 parsialmente di akuerdo, 21 no tin opinion.