WILLEMSTAD- Tin speransa realista pa studiantenan di Kòrsou sigui nan formashon profeshonal den region despues ku Gobièrnu a bai di akuerdo pa krea un supsidio adishonal di 4.4 mion florin pa finansiá estudionan den Region. Durante di tratamentu di presupuesto 2017 a tuma nota di e echo ku a baha e supsidio na e nivel di presupuestonan di 2013 i 2014.

E redukshon aki a krea un situashon finansiero difísil pa SSC, loke a pone ku no por a siguí finansiá estudionan den region. E siman aki minister di OWCS, sra. Dr. M. Esprit-Maduro a informá OWCS ku Gobièrnu a trata e petishon i a aprobá e petishon di SSC pa haña e oumentu di supsidio riba inisiativa di minister Esprit. Tur minister a pone nan skouder huntu pa Ministerio di Finansa akomodá e suma menshoná pa studiantenan sigui nan estudio den region. Pa Gobièrnu di Kòrsou ta krusial pa nos yunan ku ta e futuro di mañan forma nan mes. Ta e mesun hóbennan aki ta bin bèk pa yuda karga ekonomia di pais. Maske tin un situashon finansiero prekario, esaki no mester perhudiká nos yunan.

Gobièrnu ta kere firme ku mester sigui promové estudio den region pa motibu ku e laso entre mayornan i nan yu ta keda habrí i e chèns pa e hóbennan aki bin kas ta mas grandi. Studiantenan den region ta na Merka, Cuba, Costa Rica, Puerto Rico di kual e porsentahe di mas grandi ta na Merka. Na tur tin un total di 666 studiante ku aktualmente ta den region. E porsentahe di prestashon den region ta mas haltu ku e studia na Ulanda.

Falta di e supsidio adishonal di 4.4 mion florin di Gobièrnu pa SSC na 2015, a nifiká ku lo no por a honra petishon di estudio den region pa nos studiantenan via di SSC. Riba e punto di salida aki Gobièrnu a bai di akuerdo pa oumentá e supsidio ku 4.4 mion florin. Mediante práktikanan di efisiensia SSC mester wak kon ta sali for di défisitnan ku e tin. Minister di OWCS, miéntras tantu a kuminsá e trayekto pa huntu ku e fundashon bini ku un plan di 5 pa 6 aña di manera ku por hasi promoshon pa mas studiante sigui nan formashon profeshonal den region.