Hues no a haña probá

WILLEMSTAD.- Hues Verbeek ayera a deklará e hòmber Michel Isenia (36) liber di akusashon di estafa di mas di 300 mil florin di benta di importashon di outo for di Merka.

Ayera el a a presentá den sala di korte pa responsabilisá su mes pa su akto. Isenia  akusá pa estafá 15  persona den importashon di outo for di Merka.

Segun e akusashon, den e periodo di 13 di ougùstùs 2018 te ku 18 di sèptèmber 2018 el a tuma sèn serka e klientenan pa importá vehíkulonan for di Merka pero ku nunka no a yega.

Isenia a bisa ayera ku nunka el a estafa hende. E tambe a bira víktima di Jiks Wilson ku tin un” site” di benta di outo hinté na preisnan hopi abou.

E kier a yuda hende pa trese outo for di Merka na un bon preis, mirando ku  hopi hende no tabata gusta outo kibrá importá.

Jiks tabata tuma sèn i tabata sigurá nan ku e boto ya a Sali. Isenia tabata manda e sèn via Western Union i vários kuenta personal na vários pais inkluso Merka i Zuid Afrika.

Fiskal Jansen a haña e akusashon probá.

Fiskal a bisa ku Isenia a deklará ku e tabatin kopia di e pasport di Jiks , pero Jiks a pidié pa no mustra niun kliente pa su privasidat.

Riba Isenia su kuenta di spar a haña un kantidat enorme di sèn ku e tabata gasta na kantidat grandi.

E víktimanan tabata bisa ku e akusado tabata mustra hopi konfiabel i asina e tabata tuma nan sèn pa estafa nan.

Fiskal a splika ku normalmente riba 10 mil florin e akusado pa lei ta risibí un kondena di 24 luna pero, mirando ku ta trata di un montante di mas ku 300 mil florin,ku el a estafa e personanan, e ta hasi un demanda di 4 aña di kual 1 kondishonal.

E akusado awa na wowo a pidi diskulpa na tur hende.

El a splika ku su frei no por traha pa motibu di malesa. Ta su tata ta yuda nan i ku e tambe a pèrdè kas, trabou i tur kos.

E ku su frei ta biba di ‘voedsel bank’.

Su mayornan a trata na fia 200 mil florin pa kuminsá paga e hendenan, pero banko a ninga e fiansa.

El a bisa di ta arepentí pa loke a pasa  pero  e no ta responsabel pa e sènnan ku a keda estafá.

Abogado Marshall ku a hasi e defensa, a splika ku aki no por papia di estafa, pa motibu ku Isenia tabata e intermediario entre e klientenan ku Jiks.

El a duna nan tur detaye i asta duna e number di app di Jiks pa tur pregunta .

E abogado a bisa ku Isenia no ta responsabel pa e sènnan  ku a keda estafa di e kliente nan, sino Jiks mes.

Hues ku a tuma mei ora pa pensa, a bin bek i a splika ku su desishon ta basa riba términonan ta basta hurídiko.

Segun hues ku no por proba ku Isenia a kometé estafa. Isenia no a aserka hende pa kumpra serka dje. Supuestamente el a fungi komo intermediario di Jiks. No por  proba ku loke e ta bisa ta mentira pa motibu ku e no a gaña e klientenan ku e tabata bende outo, pero a bisa nan ku su kontakto tabata Jiks.

E klientenan na nan turno tabata manda sèn  sabiendo ku e plaka tabata bai pa Jiks. Pues no tin prueba ku Jiks ta eksistí si òf no, ni ku el a gaña e personanan pa estafa nan.

Hues a  bisa e akusado ku e ta un hende ku ta papia masha bunita i tin kontesta pa tur kos.

Apesar ku pa hues tin hopi kos ku no ta kuadra i tin hopi pregunta serka dje, den e kaso aki no por prueba estafa i tin ku aseptá numa ku ta Jiks a kometé e estafa .

Pues esei ta pone ku e ta deklará e akusado liber di tur kulpa. Esaki sigur a resultá un baño di awa friu pa tur persona den sala. Fiskal a bisa ku e ta apelá mes ora.