WILLEMSTAD. - Dia 27 di yüni ku ta fiesta na honor di ‘Nos Señora di Perpetuo Sokoro’ ku ta nifiká yudansa perpetuo, pa semper, Sùr Marianela Macaya a yama Dios danki pa su 25 aña di Bida Religioso den Kongregashon Hermanas de Nuestra Señora del Perpetuo Socorro, ku un misa di akshon di grasia selebrá na Misa di Maria Auxiliadora, Sta.

Sùr Marianela Luisa Macaya a nase dia 22 di yanüari 1979 aki na Kòrsou. E ta e promé di dos ruman muhé. Su mayornan ta Luis Paulino Macaya (ya difuntu) i Mildred Lucinda Macaya – Kirindongo.

Sùr a bai skol na Sta. Maria: Hardin di Mariposa i Avila College ku awor aki tin e nòmber di skol Maria Auxiliadora i despues MIL. Sùr a risibí tur su sakramentunan den misa di Maria Auxiliadora i a drenta grupo di Pastoral Hubenil ‘Hóbennan ku paso firme den Señor’, di unda su vokashon a nase.

Sùr Marienela a drenta kongregashon dia 7 di sèptèmber 1997. A hasi su promé votonan dia 15 di ougùstùs 2000 na Repúblika Dominikana i su voto perpetuo e la hasi dia 2 di sèptèmber 2007 na Kòrsou den misa Maria Auxiliadora.

E aña aki Sùr ta kumpli 25 aña di entrega i servisio na Dios i su pueblo. Durante e 25 aña nan aki Sùr a traha na diferente lugánan, na skolnan, den parokianan i komunidatnan hasiendo diferente trabou pastoral pa i ku mucha, hóben i hende grandi. Na Repúblika Dominikana sùr a traha na hopi lugá manera: Tamboril, Constanza, San Jose de las Matas, Parokia di Nstra. Sra. di Altagracia na Santiago, kas sentral di e kongregashon, Nagua, Las Matas de Falfan i Neiba. Na Puerto Rico sùr a traha na Aquilita ku ta pertenesé na Juana DÍaz. Tambe Sur tabata un tempu na Perú. Aki na Kòrsou Sùr a traha den Instituto Katekétiko Diosesano ku skolnan i ku formashon di laiko i katekistanan, den Parokia Maria Auxiliadora i tambe den e barionan di Souax, Seri Kandela i Gato. Aktualmente sùr su kongregashon a dun’e un mishon espesial.

Esaki nan ta palabra di Sùr Marianela di gratitut na Dios: ‘Mi Alma ta Proklamá e grandesa di Señor, pasobra Señor a hasi kosnan grandi ku mi, ta p’esei mi ta kontentu, Señor ta fuente di awa bibu’.

Hóbennan habri boso kurason pa Hesus, papia kuné i e mes lo duna boso e grasia pa deskubrí boso vokashon. Esun ku sirbi Señor nunka no ta pèrdè nada ta gana so bo por gana.

E Santu Sakrifisio di Misa a keda presidí pa Pastor Jorge  Pacheco  kompaña pa pastornan Ronald Keeban, Raul Mercedes, Oscar Renteria  i pastor Socrates Gonesto. Despues di Misa a sigui un bríndis den kas pastoral na St.Maria. Un pabien grandi pa Sùr Marianela ku pronto lo sigui ku su enkargo den eksterior.