Bida di Sùr

Bida di Sùr...Sùr Nadeska Diaz a habri su mes pa relatá kon e bida di Sùr ta. Loke a sali bon kla ta ku e persepshon ku Sùr ta kana rònt resando rosario 24 ora pa dia no ta korekto. Nan ta mesun hende i sigur ta hasi hopi trabou pa komunidat. Sùr Nadeska, hopi alegre a konta Djasabra;

Dia 7 di sèptèmber último el a kumpli 16 aña den e vokashon di Sùr i kontando 3 aña di preparashon aserka, ta yega na 19 aña den e bida di Sùr, asina Sùr Nadeska Diaz a bisa Djasabra. Kon bin den e bida di Sùr “Mi no a haña invitashon, mi no a haña e-mail, ni niun karchi i ménos WhatsApp. E tabata algu interno ku ta difísil pa splika. Mi ta bin di un famia tradishonal, ku ta bai misa tur siman. Mi tabata den e grupo di orashon Lus i Amor i mi tabata hopi aktivo den e grupo ei. For di mi 16 aña mi ta hopi aktivo i mi tabata den Youth Explotion. Pero internamente mi a sinti ku mi no ta kompleto. Mi tabatin tur kos material i tur loke mi ta deseá komo hende pero ora mi subi kama drumi mi tabata sinti falta di algu”, asina Sùr Nadeska a relatá.

Un amiga di dje tabata konosé Sùr Diana i nèt e temporada ei Sùr Diana su tata a fayesé i el a bin Kòrsou. Asina Sùr Nadeska a sera konosí ku Sùr Diana. Ora Sùr Diana a bai bèk, nan a pèrdè kontakto ku otro pero despues algun aña Sùr Diana a bin Kòrsou bèk i Sùr Nadeska a bin den kontakto bèk kuné. Einan el a a sinti su mes bon. I Sùr Diana a reta Sùr Nadeska pa e bai Venezuela den e kongregashonnan mas grandi pa e sinti e eksperensia i pa mira si loke e ta sinti, ta loke e ke i gusta. I Sùr Nadeska a bai i el a gusta. Asina ora el a bin Kòrsou bèk el a disidí na bai Venezuela pa bira Sùr. Na e momentu ei e no tabata sa sigur ku esaki ta e direkshon ku e mester a bai i p’esei el a bai purba pa un aña. Despues di un aña el a gusta i a keda. Sùr Nadeska a keda mas di 10 aña na Venezuela. Esei tabata19 aña pasá, pero promé ku esei, e tabatin un bida komun i koriente, trahando na pakus Emilia. E tabatin amiga i amigu (sin derechi manera el a yam’é). Ku esaki tambe Sùr Nadeska ta kita e persepshon for di mesa ku pa bo bira Sùr bo tin di lanta for di chikí den e ambiente di Sùr. Sùr Nadeska a lanta den un famia komun i koriente. E tabata sali ku su amistatnan, e tabata bai fiesta i bai laman komo hóben. E no ta arepentí di loke el a hasi. “Mi a hasi tur kos ku dignidat i semper pa mi balor komo hende keda na haltu, pero mi ta kontentu ku mi a disfrutá di bida sanamente”.

Mi no ta lamentá...

“I mi no ta lamentá ni un tiki di a bira Sùr”, asina Sùr Nadeska a bisa ku énfasis riba su palabranan. E ta haña asta un lástima ku e no a kuminsá mas tempran. El a kuminsá studia komo Sùr ku su kasi 33 aña. “Pero kos di Dios no ta nos kos. Dios sa tempu pa tur kos”, asina el a opservá.

No kulpa e hóben, e fout ta serka e adulto....

Sùr Nadeska sinembargo no ta kulpa hóbennan pa e forma kon nan ta dibertí awendia. Nan tin un pakiko ku nan ta hasié, asina el a bisa. E fout ta serka e adulto mes. “Den e edat ku nos tin ta difísil pa nos duna amor, pasobra nos hendenan no tabata duna amor asina fásil i nos no por kulpa nan. E forma ku nos hóbennan ta awendia

ta sosiedat a pusha nan den e direkshon ei nos tin di kampañanan i guianan. Nos hóbennan tin hopi futuro aden. Mi ta bai 100% ku mi hóbennan”.

Sùr Nadeska ta traha na Instituto Katekétiko diosesano, e ta traha ku e skolnan katóliko den e parti spiritual i ta coach hóbennan. Pero tambe e tin e parti katekétiko pa hóbennan. E ta kere fiel den hóbennan i den nan formashon. E ta forma i kampañanan. “Mi ta kompañá e hóbennan pa nan bira un bon siudadano i por si akaso tin vokashon di Sùr ta bon”. Promé ku tur kos nos ta hende, nos ta siudadano i e vokashon ta bin na kaminda.

https://youtu.be/TS1oGvFvayk

Ta fásil traha ku hóbennan awendia....

Apesar di kuantu kos ta ser bisa di hóbennan, pa Sùr Nadeska tòg ta fásil pa traha ku hóbennan awendia. Nos tin di siña kompaña hóbennan i stòp di duna hóbennan resèpt di kiko nan tin di hasi i kon nan tin di hasié. Mester sinta i tende nos hóbennan. 75% di nos hóbennan tin doló, eskases di amor, kompañamentu di nan mayornan ya ku hopi biaha mayornan ta traha i ta tiki ora ku e muchanan. E bashí ei ta keda i e bashí ei no por yen’é ku nada. Mester siña skucha hóbennan.

Hóben, duna bo mes mas balor....

Sùr ta traha ku hóbennan, tantu esnan ku “kòl ku dashi” pero tambe Sùr ta traha ku hóbennan bou di palu. I skuchando, e ta komprondé e hóbennan. Semper e ta purba pone e hóbennan riba bon kaminda i ta komprondé dikon nan ta hasiendo sierto kosnan. Sosiedat mester hasi mas kos positivo pa nos hóbennan. El a duna komo ehèmpel un biaha na un radio emisora un

DJ a invitá hóbennan pa bai un sierto lugá i na ros bisti i esun ku bini ta haña un biña grátis. I siguiente dia e mesun DJ ta bisa kuantu hóbennan a bin. Sùr Nadeska a haña kuriosidat i el a bai supermerkado pa wak kuantu pa un bòter di biña i ora el a wak e preis, e so a bisa pa su mes ku e sigur no ta bai e kos ei. I p’esei e ta kere ku mester hasi kosnan positivo i laga kosnan negativo un banda. Hóbennan mester duna nan mes mas balor.

E ròl di mas grandi ku tin ta nos sosiedat. E hóbennan ta kere den radio, televishon i ta kere ku esei ta e kaminda. Pero si e hóbennan tin e guia pa splika nan kiko ta e pro i kontra i laga e mes skohe, ta muchu mas mihó. No skohe pa e hóben pero splik’é. I nos hóbennan por skohe i skohe bon.

Bida di Sùr

Sùr Nadeska ta biba den komunidat ku dos otro Sùr mas grandi kuné. El a bisa ku ora e lanta mainta, ta hasi orashon. Su ora di lanta ta 5 or di mardugá ku eksepshon di wikènt. I mainta nan ta hasi orashon huntu i despues ta bai misa i despues Sùr Nadeska ta bai trabou. E ta bai fundashon katekétiko i einan tin diferente aktividat manera bai skol. Mèrdia e ta bai kas, kome, sosegá i wak televishon i despues ta sali bèk pa atendé den bario ku entre otro parokianan. Hopi bia e tin charla anochi. “Semper mi ta hasi algu na bienestar di esun mi dilanti”, segun Sùr Nadeska. I tin biaha e ta morto kansa i apesar di esei semper e ta kla pa yuda e hende pasobra si e no hasié positivamente, kisas un otro hende por hasié negativamente.

I e trabou di Sùr ta trese un salario kuné. E úniko diferensia den su salario ku di otro hende ta, ku su salario ta keda pone den komunidat di nan tur komo Sùr i un di nan ta paga tur kos ku mester i e ta haña sèn na man pa yuda esun ku tin mester. “Abo kisas ta bisti kòrá i pretu, ami no tin e doló di kabes ei, pasobra ami semper ta na blanku”, Sùr Nadeska a bisa ku un sonrisa riba su kara. E paña di Sùr yama Abito. Tin abito original ku nan ta bisti 21 di novèmber ora nan ta renová. Tin abito normal, ku tin manga kòrtiku i den lugá friu manga largu i riba nan kabes tin un velo. E velo no ta pasobra nan tin gana di tapa nan kabes pero si wak den historia, e Sùr tin masha tiki tempu pa drecha kabei, p’esei e Velo.

I meskos ku kualke hende komun i koriente, Sùr Nadeska tambe a yega di usa makiahe promé ku el a bira Sùr i awor komo Sùr e no ta sinti falta di e makiahe aki. “Ora bo ta den e kaminda aki, hopi por pensa ku bo tei bira Sùr i bira kèns pasobra ta misa so bo ta bai, pero mi por bai tur kaminda, mi por bai fiesta, sine i sali ku hende. Dependé unda bo ta bai, ku ki meta i semper nos ta huntu”

Dediká tempu na e muchanan...

Komo konseho na mayornan Sùr Nadeska ta pidi pa nan purba dediká tempu na e muchanan. Hopi biaha mayornan tin yen kos di hasi i esei ta di komprondé ku tin di paga gastunan den kas. Pero mayornan siña skucha, dediká tempu na e yunan pasobra e yu mester di dje. E yu no ta un eskoho i no un eror. Meskos ku a plania pa hañ’e, dediká tempu na dje. I na e hóbennan e ta pidi pa nan konfia nan mayornan òf bai un kaminda buska yudansa di hende ku por yuda.  Hopi biaha e hóben ta bai konta un amigu òf amiga na skol pero esakinan no tin e madures pa yuda e hóben i p’esei su konseho ta pa buska un hende mas madurá i mas eksperensia pa yuda e hóben.

I p’esei Sùr Nadeska tambe ta kana ku desaroyo, e tin WhatsApp pasobra ta esaki hóbennan tambe ta usa. “Mi mester ta On ku nan pero no kai den nan slum si pa henter riba riba Facebook i WhatsApp”. Nos ta biba den un komunidat awor aki ku ta eksihí hopi di medio di komunikashon i nos ta us’e pero us’e positivamente.

E hóben tin miedu di vokashon di Sùr....

Sùr Nadeska ta sinti ku hóbennan tin manera un miedu pa bai pa e vokashon di Sùr. Hóbennan tin miedu di entrega nan bida òf haña nan mes pa e grasianan aki. Den kaso di Sùr Nadeska, pa su mayornan no tabata un sorpresa ku e kier a bira Sùr. Esaki pasobra e tabata hopi envolví den misa. Pero Dios ta prepará e kaminda.

Tin diferente tipo di Sùr. Esnan na Skèrpènè ta diferente. Tin sùrnan tras di trali i Sùr Nadeska ta di e sùrnan aktivo. Ta tres grupo so a sobra ku un total di 5 Sùr ku ta aktivo aki na Kòrsou. Nan ta hopi riba kaya hasiendo trabounan pa komunidat. Pa nan ta un reto grandi pasobra tin skarsedat di Sùr.