Kantidat di sùrnan a bira mínimo i edat ta hopi haltu

WILLEMSTAD.- Na 1824 Papa di Roma a nombra Mgr. Martinus Niewindt komo perfekto di Kòrsou. Mgr. Martinus ker a mehorá bida di e trahadónan di plantashinan, no solamente pa kombertí nan pa e religion katóliko, sino tambe pa duna enseñansa. Mgr. Martinus a aserká Mgr. Van Wijkerslooth na Hulanda, ku na su turno a aserká Mère Marie Joseph, fundador i superior general di Sùrnan Franciscanessen di Roosendaal, pidiendo e pa manda sùrnan Kòrsou, pa duna enseñansa na mucha muhé.

Despues di un biahe di 70 dia riba laman, e promé seis sùrnan a pone pia riba tera di Kòrsou na waf di Willemstad i a kuminsá asina for di 12 di yanüari 1842 un historia largu di trabou misionero ku a dura mas ku 180 aña.

A konstruí, den hopi kaso den serkania di un misa, vários klooster grandi i chikí, tambe masha hopi skol grandi i chikí pa duna enseñansa na míles di mucha i forma nan pa nan por duna nan aporte na komunidat di Kòrsou i na e otro islanan, i te ku resien na komunidat di Boneiru tambe.

Komo ku e kantidat di sùrnan a bira asina mínimo i nan edat ta hopi haltu, no a sobra direktiva di kongregashon otro opshon, pa den konsulta ku e sùrnan ku ta biba aktualmente den Klooster Alverna, terminá nos mishon na Kòrsou i Boneiru.

Den kurso di añanan a krese un vínkulo fuerte entre sùrnan i pueblo. Ta p’esei ku hopi doló na nos kurason nos tin ku tuma despedida di otro, pero nos ke hasi esaki ku kara na laira i ku un kurason yen di gratitut pa tur loke huntu nos por a realisá pa henter komunidat. Ku gratitut nos ke pone nos mishon bèk den man di Dios i nos ta pidi’E su bendishon riba dje.

Den e lunanan binidero lo duna mas informashon konkreto.