WILLEMSTAD –  Dia 23 di yüni 2017  Colombia a raportá na OIE (Organisashon Mundial di Salú di Animal) ku a detektá un foko di un brote di Fiebre Aphtosa (FA) den e pais. FA ta un malesa sumamente kontagioso ku ta endémiko den hopi pais rònt mundu i ku ta afektá animal ku hoef di split manera baka, porko, karné i kabritu.  E síntomanan ta konsistí di e aparensha di blar den pata, boka i pechu di e bestianan, hipersalivashon , pèrdida di apetit i produkshon di lechi i te asta morto serka e animalnan afektá yòn. E karni di e animalnan aki tambe ta kontagioso. Pa humano e malesa no ta forma ningun peliger pa salú.

Korsou ta liber di FA i a mantené e estado ei, Hefe di Dpto. di Asuntunan Veterinario di Ministerio di GMN a tuma e medida di prekoushon di suspendé entrada di karni for di Colombia por lo pronto. Normalmente ta importá un promedio di 4 kònteiner di karni for di Colombia. Aktualmente tin 4 kònteiner riba ruta pa Kòrsou ku karni ku sigun e sèrtifikado di salú a produsí den e periodo promé ku a raportá i konfirmá e brote di FA. Lo avisá Duana pa ta mas alerta riba un posibel introdukshon di karni via aeropuerto i haf. Den EXTRA di mayan lo tin un reportahe mas amplio.