WILLEMSTAD.- Kuerpo polisial di Kòrsou (KPC) ta bai aserka sigur dos diler di outo i dos marka spesífiko di outo i tambe kompanianan di seguro pa wak kon por atendé e ladronisia di outo i naturalmente plumamentu di outonan, den 2021. Esaki ta loke ku sr. Raymond Ellis, hefe suplente di KPC a duna di konosé durante di presentashon di sifranan di krímen na Kòrsou pa aña 2020.

Pa loke ta trata ladronisia di outo tin un bahada den 2020 kompará ku 2019, di 283 kaso pa 237. Den luna di yanüari i novèmber di 2020 tabatin pik di respektivamente 38 i 36 kaso di ladronisia di outo. KPC ta bai pone prioridat na ladronisia di outo den 2021, p’asina por yega na mas bahada.

Sr. Ellis a splika ku for di desèmber 2019 a kuminsá atendé ladronisia di outo. Pa ku esei a lanta un tim ku lo bai hasi investigashon pa ladronisia di outo. Tambe a KPC a keda di bai papia ku esnan ku ta importá outo.

Den investigashon di polis a tuma nota ku dos marka di outo ku ta keda hòrtá masha hopi. Lo papia ku importadónan di e dos marka di outonan aki, pa wak kon nan por evitá ku ta hòrtá e outonan ku nan ta importá.

Tambe tin un di tres manera pa atendé ku ladornisia di outo kual ehersisio a hasi kaba den 2018, na momentu a sinta ku sektor di horeca, kaminda outonan ta keda stashoná dor di bishitantenan. A papia ku e negoshinan i asina nan a alsa vigilansia dje lugánan kaminda bishitantenan ta pone outo.

E aña aki atrobe ta bai aserka kompanianan di horeca pa halsa nan vigilansia pa protekshon di outo di siudadanonan ku ta bishita e establesimentunan aki.

Ta bai duna mas komunikashon na doño di outonan. Lo splika kon doñonan di outo por hasi algu pa kombatí ladronisia di outo.

Tambe ta bai aserka kompanianan di seguro di outo.

Mas aleu sr. Ellis a bisa ku den investigashon di kuerpo polisial pa ku ladronisia di outo, un hende ta bisa ku e outo tabata envolví den aksidente. Pero ta un forma ku nan ta hasi pa kobra e seguro sèn riba un outo ku kisas eigenlijk no tabata den niun aksidente. Ta un outo kibra ku tòg hende ta buska moda di haña e sèn di seguro.

Ku asuntu di 199 ta wak e asuntu mas mihó. Tin biaha kisas e aksidente a keda orkestra i ya kaba tin e piesanan hòrta pa pone riba e outonan i nan ta kobra seguro e preis pa drecha i piesa dje outo.

Por último na 2018 KPC a sinta ku SOAB, kual ta un forma pa hasi e ladronisia di piesa ménos atraktivo, dor di importashon di outo, i kaminda un outo tabata envolví den un aksidente. Mester yega na un forma pa sa kon ta yega na e piesa pa drecha e vehíkulo. Huntu ku SOAB ta wak kon por deliñá algu asina. Un outo ku a bin djafó i ta tur kibra, promé ku yega seguro, i kùr, mester mustra kon a yega na piesa dje outo. Asina ta hasi ladornisia di outo pa su piesa, ménos, sr. Ellis a terminá bisando.