..Riba potrèt por mira Minister señor Gilmar Pisas, direktor di sektor di Agrikultura, Medio Ambiente i Naturalesa señor Gabriel Murray huntu ku miembronan di e tim di handhaving...

Minister Pisas a instalá tim di ‘handhaving’:

 WILLEMSTAD.- Minister Pisas a instalá tim di ‘handhaving’ pa atendé ku dùmpmentu i kimamentu ilegal di shushi i otro kehonan ambiental.

Ta ampliamente konosí ku awendia tin masha hopi landfill i sitionan ilegal kaminda antisosialnan ta dùmp shushi na Kòrsou. Banda di esei tin masha hopi sitio kaminda ta kima shushi tambe ilegal i kousa hopi molèster pa esnan den bisindario i tin biaha pa hopi aña. Apesar ku e servisio ambiental ta tene kontròlnan, e situashon aki tòg a sali for di man.

Minister Pisas di Asuntunan General enkargá ku Agrikultura Medio Ambiente i Naturalesa a risibí hopi keho relashoná ku mesun ambiente.

Pa reforsá leinan eksistente, Pisas a bini ku e inisiativa pa instalá un tim di ‘handhaving’ ku e úniko tarea atendé ku e problemátika aki. E tim di ‘handhaving’ ta konsistí di 4 persona kual ta bini di Milisia di Kòrsou ku eksperensia kaba ku mantenshon di òrdu públiko i pronto lo ampliá e tim ku dos persona mas. Nan lo keda ekipá ku vehíkulonan spesial i nan lo disponé di teknologianan moderno pa asina por hasi nan trabou mas efisiente i pa nos por yega tambe na un Kòrsou kaminda nos siudadanonan ta kumpli ku lei i kuida nos medio ambiente.

Kaminda ta nesesario e tim lo aktua huntu ku otro unidatnan.