WILLEMSTAD.- Gobièrnu di Kòrsou a disidí ku lo bai amplia e sitionan di vakunashon pa asina por vakuná mas tantu hende den pueblo. E meta ta pa dado momentu un 85% òf mas di e poblashon aki ta vakuná pa asina por kontrolá e situashon. Esei por a komprondé for di deklarashon di Minister di Salubridat, Medioambiente i Naturalesa, sra. Zita Jesus-Leito. Segun e minister, gobièrnu a pensa ku lo mester implementá henter un plan di término largu pa kombatí e vírus aki di COVID. Aktualmente tin un situashon unda e kantidat di kasonan positivo ta den lift, ku mas di 150 pa dia. Pero pa por tin e situashon aki bou di kontròl òf a lo ménos pa suavis’é lo mester tin mas tantu hende vakuná pa asina nos por tin un mihó defensa komo pueblo.

Manera ta konosí, algun siman pasá a kuminsá ku e programa di vakunashon aki na Kòrsou. A opta pa duna prioridat na e grupo di personanan riba edat di 60, tambe trahadónan den kuido i hendenan ku ta vulnerabel i ta sufri di un malesa króniko. Tin mas ku 12 mil hende ku a vakuná kaba i ku un sita pa tuma e di dos angua.

Pero awor gobièrnu a disidí di dal un paso mas aleu pa mas tantu hende por ser vakuná.  Ne momentunan aki gobièrnu ta kontemplando pa habri mas sitio pa vakuná. Te awor e ta sosodiendo na Sehos. Pero e situashon aki lo tin un reunion di e paisnan den Reino (Vierlanden Overleg) i aki lo deliberá ku otro kon lo por  akomodá Kòrsou den esaki.

Segun sra. Jesus-Leito, te ku awor un kantidat di 12.760 hende a vakuná. Tin un kantidat di hende ku ta registrando. Vakunashon ta keda liber, pues e no ta obligatorio, pero último tempu por nota ku e kantidat di registrashon ta subiendo, loke ta un indikashon ku e mensahe ta yegando. Es mas,  tin timnan ku ta bayendo ku unidatnan mobil pa vakuná hende den kasnan di grandi. A bishitá diferente kas di kuido pa grandi kaba. Dje forma aki ta trata di yega mas serka di e hende ku ke vakuná.

Segun e mandatario, gobièrnu su deseo i meta ta pa mas ku 85% di poblashon ta vakuná pa asina nos tin un bon defensa.