WILLEMSTAD.- Durante e siman aki, na dos okashon tabatin aksidente ku “Quad” envolví riba Weg naar Bullenbaai.

Ta trata aki di “quad” ku ta keda usá spesialmente pa hür ku e.o turistanan òf siudadanonan ku ke keiru i disfrutá di nos isla i su naturalesa.

For di EXTRA su fuentenan, por a komprondé ku a hala atenshon di e instansianan konserní, e estado ku e tipo di “quad” nan aki ta últimamente.

E “quad” nan aki ta keda di hür diariamente durante henter dia, i no ta parse manera ta pone atenshon na e parti di “service” di e “quad” nan aki.

Mester aklará si, ku tin vários kompania ku ta hür “quad” riba nos isla pero no ta serka tur ta remarká e estado ku e “quad” nan aki ta.

Meskos tambe e echo ku tin bia no ta e “quad” nan tabatin falta durante aksidente.

Pero si ámbos aksidente a hala atenshon di esnan konserní, i a pone ku awor ta bai pone muchu mas atenshon riba e kompanianan aki i pa asina sòru ku nan ta hür kliente un vehíkulo den bon estado i ku nan ta kumpli ku seguridat den su totalidat.