Quincy Girigorie:

WILLEMSTAD.- Pa lider polítiko di partido PAR, Quincy Girigorie ta bisto ku MFK ta hasiendo tur loke ta posibel pa tapa un akto ilegal di nan minister di Finansa, Javier Silvania. “Tin un mayoria nobo di 11 asiento den parlamento i mi ta imaginá mi ku e esfuerso ta keda pa sigui tapa kosnan robes”, Girigorie ta bisa den un promé reakshon riba e kiebro ku a surgi den e koalishon di MFK i PNP.

E lider polítiko di PAR ta konkluí for di lokual a sosodé ku MFK no ta kana e trayekto di integridat i ta buska esnan ku ta sigui yuda nan tapa kosnan ku no ta korekto. E ta kontentu tambe di no a risibí un yamada pa sondia posibilidat pa PAR forma un mayoria nobo den parlamento.

PAR no ta dispuesto tampoko pa koperá pa violá di lei i protehá minister pasobra el a kometé un akto ilegal. Parlamentario pa PAR, Ana Maria Pauletta tambe ta haña e kiebro den koalishon lógiko despues di e reunion di Komishon Sentral di parlamento “baho” di djaluna kaminda parlamentarionan di koalishon ta tilda otro di ta ladron, di ta gaña i di ta sinbèrgwensa.

E ekspreshonnan di Silvania durante e reunion segun Pauletta tabata bisa hopi. Na lugá di duna argumento el a skohe pa insultá parlamentarionan di tantu oposishon komo di partido PNP.

Segun Pauletta e parlamentarionan a pidi informashon i e kontestanan ku silvania a kuestioná integridat personal di e parlamentarionan. E parlamentario pa PAR ta lamentá ku MFK ta pone man riba kabes di Silvania ku ta esun ku a kometé un akto kriminal i a kousa ku a basha gobièrnu abou.

E kiebro aki sinembargo ta algu ku por a mira ta bini for di masha dia, segun Pauletta pasobra ta pa un ratu kaba tin un guera andando entre e partidonan. “Entre otro David Seferina na mas ku un okashon a lastra minister di Desaroyo Ekonómiko, Ruisandro Cijntje riba e situashon na marshe nobo.”

Frakshon di PAR a manda djamars un petishon pa reunion públiko ku e tópiko: akshon di minister di Finansa pa duna eksonerashon na debe di impuesto. Esaki despues ku a tuma nota ku Silvania den e reunion di Komishon Sentral di djaluna a bula pipa pa kontestá preguntanan riba e base legal di su akshonnan.

Segun Girigorie Silvania a duna un sho djaluna último riba kon ta bula pipa pa preguntanan di parlamento i a keda ripití ku a tuma desishon di limpia registronan di Ontvanger a base di un maneho di Ontvanger. Pa e motibu aki pues ku ta pidi un reunion públiko pa debatí ku e minister spesífikamente riba su akshonnan pa duna eksonerashon di 3 miar florin na debe di impuesto.

Foto:

...Quincy Girigorie...