WILLEMSTAD.- For di ougùstùs 2017 un grupo bastante grandi di hóben lo kuminsá ku nan edukashon pa bira milisiano profeshonal. Despues di 12 luna nan por traha den Milisia di Kòrsou CURMIL, ku ta para pa seguridat i stabilidat riba Kòrsou.
Milisia di Kòrsou CURMIL, ta un milisiano profeshonal ku ta konsistí di hóbennan ku ta drenta ku un diploma di un edukashon preparatorio sekundario VSBO òf un diploma di un formashon SBO nivel 1.
E hóbennan aki ta drenta den servisio di Ministerio di Hustisia di pais Kòrsou i ta wòrdu asigná na Komandante di Forsa Naval den Caribe, kaminda nan ta sigui formashon militar bou di responsabilidat di Komandante di e Kazèrne di Marina na Suffisant Kòrsou. CURMIL ta para pa siguridat i stabilidat.
Milisia di Kòrsou ta ehersé trabounan den un peloton operashonal bèrdè i pelotonnan di seguridat i vigilansia blou na kazèrne militar Suffisant i na base militar Parera, kaminda nan ta wòrdu inkorporá den diferente funshon. E balornan fundamental di CURMIL ta; disiplina, responsabilidat i union.
Despues di e formashon di CURMIL, e milisianonan den koperashon ku e militarnan
di Defensa Ulandes ta wòrdu inkorporá den e siguiente aktividatnan i funshonnan:
Tantu individual komo den grupo, den situashonnan normal i situashonnan pisá, na tera òf riba laman, ehersé trabounan individual, militar i di vigilansia, por ehèmpel mishonnan militar, vigilá i sigurá ophetonan, duna yudansa militar den desasternan i despues di pasashi di orkan. CURMIL ademas ta traha warda, ta partisipá na ehersisionan militar i diferente otro trabounan den e kazèrnenan. Tambe CURMIL ta guia e hóbennan di e Trayekto di Formashon Sosial den aspektonan di disiplina i koperashon, di moda ku nan tin mas oportunidat pa haña un trabou den komunidat.
Despues di terminá e formashon militar básiko di 12 luna ku éksito, ta otorgá un kontrato pa un periodo máksimo di 4 aña, si e funshonamentu ta konsistente i kompleto den e organisashon di Milisia di Kòrsou CURMIL. Funshonarionan di CURMIL durante nan karera ademas por wòrdu formá komo miembronan ehekutivo di e organisashon di CURMIL. E milisiano di CURMIL por kana un karera militar te 30 aña di edat.
Despues di su karera militar e milisiano di CURMIL ta kapasitá pa funshonnan den servisionan uniformá di gobièrnu di Kòrsou òf den sektor privá.
Ken ta wòrdu atmití na CURMIL? Kandidatonan di sekso maskulino, ku na inisio di e formashon pa CURMIL (ougùstùs 2017) tin e edat mínimo di 18 aña i máksimo 24 aña. Eksigensianan di e funshon ta e siguiente:
-Ta inskribí den e registro sivil di Kòrsou komo siudadano;
-Di Nashonalidat Ulandes;
-Ta dispone di un VSBO diploma òf un diploma SBO nivel 1;
-Tin un bon kondishon físiko i mental i mester por landa;
-Por resistí stress, abilidat pa kontené bo mes, abilidat di resistensia i bon abilidatnan sosial;
-Dominio di e idiomanan Ulandes i Papiamentu.

E siguiente tèstnan i/òf investigashonnan ta determiná e kapasidat di e kandidato pa e funshon di milisiano di CURMIL:
Un tèst físiko, di landamentu, médiko, sikológiko, mental i di antesedente. I tambe un tèst por eskrito ta forma parti di e prosedura di selekshon.
E abilidat pa wòrdu atmití na e formashon pa Milisia di CURMIL ta wòrdu determiná pa un komishon di selekshon.
Kandidatonan ku ta kumpli ku e eksigensianan, mester yena e formulario di solisitut kompletu i entregá esaki huntu ku kopia di diplomanan i sertifikadonan di formashonnan i kursonan lográ na e siguiente direkshon:
Marine kazerne Suffisant
Afdeling Human Resources Management, t.a.v. mevr. M.S. Toppenberg, Senior medewerker HRM, Kaya Kolonel C. Winkel Z/n Curaçao.
E formulario di solisitut por wòrdu solisitá via e siguiente koreo elektróniko. E formulario di solisitut por wòrdu entrega na entrada di Marinekazerne Suffisant òf via e mesun koreo elektróniko: ms.toppenberg@mindef.nl.
Por haña mas informashon telefóniko via e siguiente number di telefòn 463-7573.
Ultimo fecha pa entregá e formulario di solisitut ta 24 di mart 2017. Fecha di inisio di e formashon pa CURMIL ta 21 di ougùstùs 2017.