WILLEMSTAD.- Sindikato ABVO ta lamentá ku ta den medionan di komunikashon trahadónan mester a tuma nota di konfirmashon di minister di finansa i di Banko Sentral ku definitivamente ta bai sera Girobank.

ABVO pa medio di nan presidente sr. Adry Williams a bisa ku ta  hopi lamentabel ku gobièrnu i Banko Sentral ta saka un komunikado den fin di siman i dal e trahadónan kuné. Tur esaki sin a papia ku trahadónan i sin a bisa sindikato nada.

“Semper nos tabatin tabatin un bon relashon ku minister di finansa i Banko Sentral riba Girobank”, segun Williams.

E sindikato a kòrdá kon aña pasá nan a atendé bahamentu di un kantidat di trahadónan ku kier a bai. Tabatin un grupo ku a disidí ku nan ta keda pa yuda e banko i awor nan ta haña un sla bou di faha i ta algu no apropiá.

Tantu Banko Sentral i gobièrnu mester sa mas mihó kon  ta palabrá e tipo di kosnan aki i pa e no ta un sorpresa pa tratadonan.

Sr. Williams lo bai buska kontakto ku Banko Sentral i lo bai traha pa tur loke trahadónan meresé pa por haña esaki.

Minister Kenneth Gijsbertha di su banda den programa “Punto Final” a  splika ku awor ku tin negosiashonnan andando pa OHO, a inkluí un suma di 170 mion pa tur hende ku tin sèn den Giro por haña  kompleto. Sinembargo tin sierto empresa ku lo no haña nan sènnan mesora manera un APC ku tin110 mion, gobièrnu 80 mion i algun otro kompanianan di gobièrnu ku tambe tin basta sèn den Giro.

Mester sòru pa tur hende haña nan sèn.

Mas aleu sr. Gijsbertha a bisa ku si gobièrnu a permití Girobank bai bankarota, tur hende lo a pèrdè nan sèn.

Un grupo dje trahadónan, lo por pasa pa un entidat kual entidat lo keda enkargá pa kobra debenan atrasá, òf esnan ku a fia sèn i no ta paga, p’asina por paga esnan ku su plaka a keda den Girobank.

 

 

 

LAGA UN KOMENTARIO

Please enter your comment!
Please enter your name here