WILLEMSTAD.- Durante di tratamentu di kasonan di infrakshon den tráfiko, hues a splika klaramente e fenómeno di uzo di telefòn.

Hopi persona ku haña but pa telefòn, ta presentá den sala di korte i bisa ku e but ta inhustu, pa motibu ku nan no tabatin e telefòn solamente den nan man, pero no tabata papiando durante ku nan tabata kore outo.

Relashoná ku esaki hues a bisa, ku no ta importá ku bo no ta papiando na telefòn, porta djis ba wak den dje,  ora ba yega para na lus, òf kiko otro ku e por ta, si e ta den bo man, bo por haña un but.

Hues a splika ku e motibu ta ku telefòn mester ta “handsfree”, na momento ku e shofùr ta manehá un vehíkulo .

Relashoná ku esaki, un shofùr a presentá den sala i splika ku e tabatin e telefòn den su man sin ta papiando, ora ku polis a par’e i dun’e un but.

Segun e prosèsverbal, e hòmber tabata riba karetera pará den lus, ora polis a tuma nota ku e tabata den su telefòn .

Riba esaki, e akusado a splika ku na e momentonan ei e tabata pará na lus i a djis wak algu den su telefòn, pero no a yama, papia, ni “scroll” nada den su telefòn.

Fiskal na su turno a duna di konos’é, ku ta estriktamente prohibí pa papia, wak, “app”, òf kualke otro kos na telefòn, ora ku e shofùr ta bou di stür.

Fiskal a haña e akusashon probá i bisa ku normalmente e but ta 150 florin, pero pa e bia aki e  ta redusié te na 75 florin.