WILLEMSTAD.- Habitantenan di Lagun, Jeremi i bisindario ta di opinion ku nan no ta kontra di desaroyo, pero e desaroyo ei no por ta muchu drástiko i stroba nan rutina diario di bida. Teniendo kuenta ku tin di haber aki di playa, ta importante pa tene kuenta ku e rutina di piskadónan tambe. Pa loke por a mira te awor, no a tene kuenta ku nada di esei, sino ku a simplemente presentá algun proyekto asumiendo ku e komunidat ta akseptá nan. T’asina ku gobièrnu di Kòrsou a disidí di tene un foro públiko ayera na sentro di bario Lagun pa tende opinion di pueblo riba e dos proyektonan i drechamentu di playa en general.

Tin un habitante ku a kolekshoná firma den e bario i a trese su preokupashon dilanti. Un dje habitantenan a bisa bon kla ku en prinsipio nan ta kontra di e proyekto. Na promé lugá, e proyekto aki por ta masha bunita riba papel, pero e ta tuma un 2/3 parti dje playa, no ta tene kuenta ku e rutina dje piskadónan, siendo ku ta un playa di piskadó. Minister i otronan ta pasa na Lagun i Jeremi pa un ratu, pero nan komo habitantenan ta pasa aki tur dia, henter dia, henter nan bida i nan sa mihó.

Es mas, no ta tene kuenta ku aktividatnan sosial. No lubidá ku regularmente sa tin gruponan ku ta bai Lagun pa organisá aktividatnan di kamper etc. e kos di mas importante ta ku no a papia ku e pueblo di Lagun!

Tin otro habitante di desendensia hulandes europeo ku tambe a ekspresá su preokupashon i strañesa. Esei pa motibu ku e ta formando parti di un grupo di e.o. habitantenan di Lagun i gruponan di interes ku a mustra interes i asta a pidi opshon pa nan por entamá un proyekto, pero nunka nan a haña kontesta di gobièrnu.

Tin habitante ku a dirigí su mes na Minister Pisas, rekordando e ku habitantenan a invit’é pa bin tende serka nan kiko ta nan preokupashon. Hopi di nan ta hendenan ku konosé sr. Pisas riba un base personal, nan a vota i lo sigui vota MFK, pero kaminda un kos ta robes nan tin derechi si di bisa ku e ta robes.

Finalmente tin habitante ku a pidi pa por fabor no mishi ku nada, laga e playanan manera nan ta, tur hende a kustumbrá ku nan ta bai laman ku nan pan i un tiki djus i pasa dushi. No tin mester di kambia nada!