Asosashon di Restorantnan aki na Kòrsou:

WILLEMSTAD. - Asosashon di Restorantnan (CRA) aki na Kòrsou ta sinti nan deskriminá, sigur esnan ku tin solamente posibilidat pa sirbi nan klientenan paden.

E asosashon CRA ta di opinion, ku despues di e rueda di prensa djaluna tras di lomba, ora ku a bira konosí ku restorantnan por keda habrí te ku 10 or di anochi i tambe por sirbi alkohòl, na mes momentu CRA a trèk na bèl pa esunnan ku ta duna servisio paden, ku si no por habri nan portanan ainda.

Pa CRA ta inakseptabel kon ta permití teaternan, misa, gym i kasino ku si tin mag di habri nan portanan ku tur ta aktividatnan paden, ta prohibí restorantnan ku tin nan servisio paden mantené nan porta será, o sea no por duna servisio paden.

Manera menshoná esaki ta inaseptabel pa CRA e deskriminashon aki i e asosashon ta di opinion ku mester bin kambio den esaki.

P’esei lo bin diálogo entre e diferente ‘stakeholder’ nan pa loke ta trata e aspekto ya menshoná i CRA ta di opinion ku nan lo sali afó ku un akuerdo favorabel.

CRA ta splika ku for di luna di mei di aña pasá a desaroyá un protokòl ampliamente kon pa habri bèk i esaki mester sirbi komo punto di salida awor aki tambe, asina CRA ta opiná.

Djabièrnè awor tin un reunion entre di Gobièrnu i CRA i si no yega na un akuerdo, CRA a anunsiá kaba ku nan lo tuma otro paso pa logra restorantnan ku ta sirbi paden tambe por habri nan portanan.

CRA ta enfatisá ku e sektor di horeca tin e difísil i nan ta kontentu ku a suavisá medidanan, pero ainda ta tene un grupo di restorant atras, esta e grupo ku ta sirbi paden. Take-out solamente i òf entrega na kas no ta sufisiente pa por kumpli ku tur debernan ni maske ku nan ta haña NOW. Esakinan no ta yuda e situashon finansiero ku e grupo aki ta pasando aden.