WILLEMSTAD, ORANJESTAD.- Relashoná ku e vírus korona, CDC ta menshoná ku nan tin chekeonan den tur airopuerto entre otro esun di Miami ku ta unu internashonal i a menshoná Aruba kaminda tin e “preclearance”.

CDC, e sentro di kontrol di malesa i prevenshon. ta reforsando e detekshon den 15 stashon di karentena mas den henter e pais, airopuertonan i otro lugánan kaminda trahadónan di salu ta revisá regularmente e biaheronan ku ta yega, pa detektá señalnan di enfermedat.

Entre e airopuertonan aki tin esun internashonal di Miami kual su stashon ta inkluí tambe airopuertonan di outorisashon previo na Bahamas i Aruba i tur otro airopuerto na Florida, Mississippi i Alabama.

Mas di 10 mion pasahero ta pasa via MIA pa aña.

No nesesariamente e biaheronan mester ta malu na e momentu ei, asina dòkter Nancy Meesonier di CDC a informá. E tèstnan ta un oportunidat tambe pa eduká e biaheronan ku si nan tin síntomanan manera kayente di kurpa i tosamentu, despues ku nan regresá di e zona kaminda tin e brote di e vírus nan mester komuniká esaki na nan dòkter. Esaki ta eksaktamente loke e promé pashèntnan ku a yega Merka a hasi. Na Merka a reportá te ainda  5 kaso di e vírus korona.