Tambe bou di grandinan

WILLEMSTAD.- Último tempu ta nota ku e kantidat di kaso di hóben ku ta sufri di epilepsia ta subiendo. Stichting Epilepsie Curaçao ta haña mas i mas notifikashon di hóbennan ku direpente ta haña atake epiléptiko. Asina direktor di e fundashon, Bruna Kwidama ta duna di konosé den e podcast 3’or ku Gino.

Ta trata aki di hóbennan di 14 pa 16 aña, e ta splika. “Pa nos poblashon chikitu e kantidat di kasonan aki ta di mas. E no ta formal.” Den e kuadro aki e fundashon a kuminsá ku siklo di informashon na skolnan, pasobra ta importante ku maestronan tin e informashon di epilepsia i asina siña rekonosé esaki.

“Tin kasonan di atake epiléptiko ku ta asina leve (‘summier’) ku a base di tin mas informashon e maestro por tuma nota di esaki. Den pasado tabatin hopi kaso di muchanan ku ta te na grandi, segun ku e epilepsia ta sigui desaroyá, nan a haña sa ku nan tin epilepsia.” Kwidama ta enfatisá ku ta hopi importante ku ta diagnostiká i kuminsá trata e malesa mas lihé ku ta posibel.

Kada un atake epiléptiko ta un gòlpi pa e selebre ku tur e konsekuensianan ku esaki tin. P’esei tambe un hende ku haña un atake ta keda kansá despues. En todo kaso Stichting Epilepsie Curaçao no sa ta kiko por ta e kousa ku ta mirando mas kaso bou di hóbennan.

Ta trata pa huntu ku dòkternan yega asina leu ku gobièrnu ta hasi un investigashon, na skolnan tambe, pa haña sa kiko ta pasando. “Entretantu siensia a bai dilanti i ta hopi mas leu den identifiká kiko por ta kousa di e epilepsia. Si den pasado tabata bisa ku den 70 porshento di kaso no ta konosí kiko ta kousa atakenan epiléptiko, aworakí esei a baha te na 30 porshento”, Kwidama ta bisa.

Na Kòrsou tin spesialistanan epileptólogo, pero meskos ku ta e kaso ku otro tipo di spesialistanan, tin falta na kantidat di spesialista i e listanan di espera ta largu. Bou di grandinan tambe ta nota ku e kasonan di epilepsia ta haltu. Hendenan grandi ta sufri di otro kondishonnan manera demensia ku ta un kondishon di e selebre ku por kousa epilepsia.

Bou di muchanan ku outismo tambe ta nota ku tin mas tantu kaso di epilepsia. E fundashon a tene resien un charla pa skolnan spesial kaminda por a nota ku e muchanan tin múltiple kondishon di salú manera outismo i epilepsia, i den sierto kaso asta otro kondishonnan médiko ku ta bin aserka.