WILLEMSTAD.-Gobièrnu di Kòrsou a informá ku manera primintí a hasi evaluashon di medidanan ku ta na vigor den kuadro di prekoushon pa Covid-19. Premier Eugene Rhuggenaath un bia mas a gradisí e gran kantidat di hende den komunidat ku ta kumpli ku distansia sosial i reglanan di higiena. Esaki ketu bai ta e mihó manera pa evitá di keda kontagiá ku Covid.

Den e evaluashon a yega na e konklushon ku e grado di kontagio ta hopi haltu ainda i meskos e kantidat di klùsternan ta hopi i no por determiná orígen di bastante kaso di kontagio. Pa loke ta trata e ‘toque de queda’ esei ta keda na vigor di 11’or anochi pa 5’or di mainta. Ademas no ta posibel pa haña eksonerashon pa eventonan di mas ku 50 persona.