No por suavisá ainda pasobra situashon no ta bou di kontrol

WILLEMSTAD.-Premier Rhuggenaath den e briefing di awe a informa komunidat ku gobièrnu i e tim di salubridat a hasi evaluashon profundo di e situashon aktual. Despues di a evaluá a yega na e desishon ku tur medida den kuadro di kombatimentu di Covid ta keda prolongá te 30 aprel 2021.

Esaki ta nifiká ku entre otro ‘toque de queda’ ta keda mantene na 7’or anochi ku eksepshon di funshonnan vital. Esaki ta pone ku establesimentunan vital por habri te ku 6’or atardi. Tin diferente ahuste manera agensianan funerario por permití un maksimo di 10 persona presente na un entiero. Esaki no ta inkluí e personal di e agensia funerario. E tim a interkambiá ku institutonan finansiero i CBCS. Bankonan por brinda solamente servisio di urgensia.

Dr. Gerstenbluth a indiká ku ainda e R-factor ta demasiado haltu. A tuma media promé ku elekshon i a sigui tuma mas medida pa baha e R. E medidanan tabatin efekto, pero ainda e ta demasiado haltu.

Gerstenbluth a sigui bisa ku si Kòrsou laga lòs awor aki e poblashon lo bolbe haña mesun efekto.

No por relahá pasobra e situashon no ta bou di kontrol. E medidanan ta pa evitá ku hende ta bini huntu i kontagiá otro. Mester sigui tuma media, tene nos mes na e medidanan i mester bakuna.

Gerstenbluth ta indiká ku e vírus ta otro for di komienso, e ta afektando gruponan mas yòn tambe. Mas detaye den edishon di EXTRA.