Segun minister di finansa Javier Silvania
WILLEMSTAD.- Durante un evento di Real Estate, minister Javier Silvania a pone atenshon riba entre otro Tax Holiday, kaminda el a bisa ku gobièrnu ta revisando esaki.
Mester stimulá invershonnan den e sektor inmóbil aki. Gobièrnu a kambia kaba e regla di 80/20 pa 20/80 pa tax holiday pa desaroyo di tereno. E kambio aki a trese su resultadonan ku diferente proyekto.
Pero e Sektor di asuntunan fiskal (SFZ) tambe ta enfrentá su desafionan. E reglanan di ehekushon di e tax holiday aktual ta kompliká. E ta kousa tardansa den práktika. Tambe e forma di nos legislashon di tax holiday ta bou di preshon internashonal. Na e momentu aki, gobièrnu ta pensa riba manera di revisá e tax holiday pa e kuadrá ku e ekspektativanan di tur grupo di interes, ku ta esnan den Real Estate i tambe e aparato di gobièrnu i partinan internashonal.
E no ta solamente un kuestion fiskal tékniko. E revishon di e reglamentashon di tax holiday ta pidi un esfuerso komun di tur partido pa hasi e fasilidatnan pa e sektor di konstrukshon mas efisiente i mas efektivo. Pa esei, minister Silvania mester di e yudansa di tur den e sektor di Real Estate. El a bisa ku e ta habrí pa ideanan.
Nan ke un kontribushon balansá di tantu invershonista di eksterior komo lokal pa e kresementu i desaroyo di Kòrsou. E ta nifiká kolaborashon, responsabilidat kompartí i un esfuerso komun pa krea un klima di invershon atraktivo i sostenibel. E revishon di e reglamentashon di tax holiday ta kana pareu ku esei.
Aparte di esei, minister ke trata e asuntu di Omzetbelasting riba akomodashon kòrtiku i e ròl di plataforma online manera Airbnb i Booking.com. E plataformanan aki tin un impakto enorme riba nos sektor di turismo i ta ofresé gran oportunidat. Mester sòru ku tantu e komishonnan di e plataforma online i e entradanan di e hürdónan ta wòrdu korektamente inkluí den e impuesto. E ta sigurá un kontribushon hustu di tur partido envolví.
E importansia di e sektor di bienes inmóbil pa nos ekonomia no por keda enfatisá sufisiente. E sektor di konstrukshon ta un motor di kresementu, inovashon i empleo. Kada desaroyo nobo, kada invershon nobo ta kontribuí na e prosperidat di nos isla. Invershonista di for di eksterior mester kontribuí meskos ku esun lokal, i huntu por krea un medio unda tur hende por floresé, minister Silvania a enfatisá.
Tambe minister a pidi atenshon pa e asuntu di kas sosial. Tin un falta grandi di kas den e segmento aki, i e problema mester wòrdu atendé. Minister ta haña ku kada hende na Kòrsou mester tin akseso na un kas desente, i e ta hasi e petishon na e desaroyadónan di bienes inmóbil pa pensa huntu i traha huntu riba solushon pa e área aki. E ta mira esaki no solamente komo un deber moral, pero tambe un oportunidat pa kontribuí na e stabilidat sosial i bienestar di nos isla.
Mas aleu minister a pone atenshon riba ei importansia finansiero di impuesto riba bienes inmóbil esta OZB na Kòrsou. E gobernashon aki a eliminá retrasonan i logra gran mehorashon na haña e doño di bienes i e kolekshon di e OZB. E ta un proseso kontinuo ku lo sigui traha riba. Un kolekshon efisiente di e OZB ta krusial pa e finansa di nos servisio públiko i nos infrastruktura. No lubidá pa nota kumpradó di bienes inmóbil tokante nan obligashon di reportá e transakshon pa e impuesto di bienes inmóbil.
I ta trahando duru pa e añanan ku a pasa mehorá e atenshon di servisio di impuesto. Un kantidat konsiderabel di proseso a wòrdu outomatisá, inkluí deklarashon i pago di impuesto. E ta permití traha mas efisiente i e ta reflehá den e kolekshon di impuesto pa nos pais. Minister a hasi un apelashon tambe na e desaroyadónan pa yudá distribuí e preshon di impuesto mas hustu i igual, dor di haña tur hende kontribuí i redusí trahamentu ilegal.
E ta e intenshon di e gobernashon pa den futuro legalisá e trahadónan sin dokumento ku tin trabou. Naturalmente e ta nifiká ku nan tambe mester kontribuí na e benefisio sosial i ta obligá na paga impuesto di entrada na Kòrsou.
